OKMK klubi bosh murabbiyi Mirjalol Qosimov Coca-Cola O‘zbekiston Kubogi finali doirasida “Paxtakor”ga qarshi kechadigan uchrashuv oldidan o‘z fikrlari bilan o‘rtoqlashdi.
Superliga doirasida “Navbahor”ga qarshi o‘yinda Namanganga kubok finali uchun qaytib, mezbonlarga qarshi o‘ynashni niyat qilgandik. Ammo bu futbol, o‘z mehnatimiz bilan finalga chiqdik. Bu yerga yaxshi niyatlar bilan keldik. Namangandagi bu stadionda muhit doim yaxshi bo‘lgan. Muxlislar doim “Navbahor”ning 12-o‘yinchisi bo‘lib keladi. OKMK jamoasi finalga munosib tayyorlandi. “Paxtakor”ni ta’riflash shart emas, raqib qanday kuchga ega ekanligini barcha biladi. Bekorga ular chempion bo‘lmadi. Ammo kubok finali bitta o‘yindan iborat, g‘alaba qozonish uchun harakat qilamiz. Stadionga kelgan muxlislar kurashlarga boy o‘yinni tomosha qiladi va xursand bo‘lib uyga qaytishadi.Finalga osongina chiqib qolmadik. Dastlab safarda “Lokomotiv”ni mag‘lub etdik, keyin “Metallurg”ga qarshi bahs bo‘ldi, yarim finalda “Nasaf”ni yutdik. Bu jamoa ham juda kuchli. Oson o‘yinlar bo‘lgani yo‘q. Haqli ravishda finalga chiqdik. Bitta o‘yinda barcha narsa bo‘lishi mumkin, kamroq xato qilishga va imkoniyatlardan foydalanishga intilamiz. Finalda borimizni berib o‘ynashga harakat qilamiz.
Futbolda jarohatlar ko‘p uchraydi, bu odatiy holat. Futbol va jarohatlar yonma-yon turadi. Pandemiya sabab butun dunyo uchun yil juda og‘ir o‘tdi. Mavsum ham cho‘zilib ketdi. Sanjar Tursunov maydonga tusha olmaydi. Bobur Yo‘ldoshev, Mirjamol Qosimov va Murodjon Toshmatovda kichik jarohatlar bor.
Biz futbolni muxlislar uchun o‘ynaymiz. Ular stadionga kelib, yoqtirgan jamoalariga muxlislik qilishini, futboldan zavq olishini istaymiz. Namanganda doim ajoyib muxlislik bo‘lgan, o‘ylashimcha, muxlislar to‘la stadionda o‘ynaymiz. Bo‘sh tribunalar baribir finalga xos emas. Muhit ham boshqacha bo‘ladi. O‘z vaqtida futbol o‘ynaganimda ham Namanganda muxlislar ajoyib tarzda o‘z jamoalarini qo‘llab-quvvatlardi. Namanganda futbolga bo‘lgan mehr o‘zgacha.
Ayni paytda OChL haqida o‘ylayotganim yo‘q. Oldimizda final bor va shu bois xalqaro musobaqa haqida hozirdan o‘ylash noto‘g‘ri bo‘lardi. Men o‘yindan-o‘yinga sakrashni yoqtirmayman. Bizni “Paxtakor” bilan muhim o‘yin kutmoqda.
Agar Osiyo Chempionlar Ligasida ishtirok etsak, unda shunga yarasha tarkibni kuchaytirishimiz kerak bo‘ladi. Chunki OKMK xalqaro maydonda nafaqat Olmaliq shahri sha’ni, balki butun O‘zbekiston sharafini himoya qiladi va yaxshi natijalar qayd etishga intilamiz.
Ancha yillardan buyon murabbiylik qilyapman va hakamlar haqida deyarli gapirmaganman. Hakamlar nazoratchilari bor, ularga baho berish bizning ish emas. Finalda xorijlik hakamlar? Oldinroq ham shunday bo‘lganini eslayman, lekin ayni paytda o‘zbek hakamlarining malakasi arab hakamlaridan balandroq.
OKMK jamoasi yakunlayotgan yildan ko‘ngli to‘ldimi? Jamoada qorovuldan boshlab rahbargacha barcha bitta maqsad yo‘lida birlashgan. Oson yil bo‘lgani yo‘q, mavsum juda og‘ir o‘tdi. Barcha futbolchilar charchagan. OKMK o‘z tarixida ilk bor chempionatda bronza medallariga ega chiqdi. Bu oson bo‘lgani yo‘q. Buni tagida katta mehnat turibdi. Jamoada ishlaydigan barcha buni yaxshi biladi.
Mirjalol Qosimov, OKMK bosh murabbiyi
Mavzuga doir: Shota Arveladze: “OKMK — finalda o‘ynashni biladigan jamoa. O‘yinga eng kuchli tarkibni tashlaymiz”
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)