Google Photo oddiy suratlarni uch o‘lchamli olamga aylantirishni boshladi

Google Photo standart suratlarni “kinematografik kadrlar”ga aylantirishga qodir yangi funksiyani ishga tushirdi, deb xabar beradi Hi-Tech.Mail.ru.

Yangi tasvirni yaratish uchun sun’iy intellekt texnologiyasidan foydalaniladi. Algoritmlar dastlabki tasvirni tahlil qiladi va tasvirlangan sahnaning uch o‘lchamli ko‘rinishini yaratish uchun unga mos keladigan optimal chuqurlik maydonini tanlab oladi. Ta’kidlash kerakki, mazkur texnologiya surat yoki kamera haqida hech qanday ma’lumot bo‘lmasa ham ishlayveradi.

Kompaniyadagilarning ta’kidlashicha, “kinematografik kadrlar” avtomatik ravishda Photo servisining o‘zida yaratilaveradi. Ular “Xotiralar” (Memories) bo‘limida paydo bo‘ladi va foydalanuvchilar uni tomosha qilishi mumkin. U yerda oddiy suratlar o‘rniga barqaror panoramali effektga ega animatsiya namoyish etiladi — kinoda xuddi shunday ko‘rsatiladi, statik sahnalar va obyektlar “harakatlanayotgandek” ko‘rinadi, shuningdek, ular kattalashadi va tiniqlashadi.

Statik suratda texnologiyaning ishlash prinsipini yaxshi tushunib olish qiyin, biroq u oddiy va qayta ishlangan suratlarni taqqoslash orqali farqlarni ko‘rsatib berishga qodir.

Chap tarafda standart kadr tasvirlangan, o‘ng tarafda — algoritm tomonidan tahrirlangani. Qizaloqning atrofidagi fon, ayrim joylardagi mayda detallar ham ko‘zga tashlangani sabab u tiniqroq ko‘rinish olgan. Surat foydalanuvchiga “suzib chiqayotgandek”, 3D effekti yaxshiroq ko‘ringan.

Hozircha mazkur funksiyadan faqat ayrim insonlar foydalana oladi, biroq kompaniyadagilar tez orada u Google Photo’ning barcha foydalanuvchilari uchun ishga tushirilishini va’da qilmoqda.

Avvalroq Google qo‘shiqlarni hushtak va xirgoyi orqali qidirishni “o‘rganib olgani” to‘g‘risida xabar berilgandi.