Tomoshabinlar uchun haligacha sevimli bo‘lgan “Shum bola” badiiy filmida Omon rolini ijro etgan Saidkarim Saidoripov 57 yoshida vafot etdi. Bu xabarni marhumning yaqinlari “Daryo” muxbiri Mirolim Isajonovga tasdiqladi.
“2020-yilning 13-dekabr kuni tongda hayotdan ko‘z yumdi. Qandli diabeti bor edi, ba’zan yurak xastaligi ham bezovta qilib turardi. Ammo hech qachon salomatligi og‘ir ahvolga tushmagandi”, — dedi Saidkarim Saidoripovning kelini.
Eslatib o‘tamiz, birgina roli bilan mashhurlikka erishgan Saidkarim Saidoripovning vafoti haqida ancha yil oldin gap-so‘zlar tarqalgandi. O‘shanda marhum va uning yaqinlari bu mish-mish ekanligini ta’kidlagandi.
Ma’lumot uchun, Saidkarim Saidoripov 1975-yili “Shum bola” filmi uchun e’lon qilingan kastingda ishtirok etib, avvaliga bosh rolga tasdiqlanadi. Keyinroq esa Qoravoy roli Abdurayim Abduvahobovga nasib etadi. 12 yoshida kinorejissor Damir Salimovning “Shum bola”sida Omon rolini o‘ynagach, 15 yoshida rejissor Shuhrat Abbosovning “Olovli yo‘llar” filmida ham qatnashadi. Ota-onasi kinolarda suratga tushishiga jiddiy qarshilik ko‘rsatganidan so‘ng 1980—1985-yillar sobiq Toshkent davlat universitetining falsafa-iqtisod fakulteti siyosiy iqtisod yo‘nalishida o‘qigan. Sohasi bo‘yicha bir qancha tashkilotlarda faoliyat yuritgan.
“Shum bola” filmida Qoravoy obrazini yaratgan aktyor Abdurayim Abduvahobov ham 2020-yilning iyul oyida vafot etgan edi.
Izoh (0)