Томошабинлар учун ҳалигача севимли бўлган «Шум бола» бадиий фильмида Омон ролини ижро этган Саидкарим Саидорипов 57 ёшида вафот этди. Бу хабарни марҳумнинг яқинлари «Дарё» мухбири Миролим Исажоновга тасдиқлади.
«2020 йилнинг 13 декабрь куни тонгда ҳаётдан кўз юмди. Қандли диабети бор эди, баъзан юрак хасталиги ҳам безовта қилиб турарди. Аммо ҳеч қачон саломатлиги оғир аҳволга тушмаганди», — деди Саидкарим Саидориповнинг келини.
Эслатиб ўтамиз, биргина роли билан машҳурликка эришган Саидкарим Саидориповнинг вафоти ҳақида анча йил олдин гап-сўзлар тарқалганди. Ўшанда марҳум ва унинг яқинлари бу миш-миш эканлигини таъкидлаганди.
Маълумот учун, Саидкарим Саидорипов 1975 йили «Шум бола» фильми учун эълон қилинган кастингда иштирок этиб, аввалига бош ролга тасдиқланади. Кейинроқ эса Қоравой роли Абдурайим Абдуваҳобовга насиб этади. 12 ёшида кинорежиссёр Дамир Салимовнинг «Шум бола»сида Омон ролини ўйнагач, 15 ёшида режиссёр Шуҳрат Аббосовнинг «Оловли йўллар» фильмида ҳам қатнашади. Ота-онаси киноларда суратга тушишига жиддий қаршилик кўрсатганидан сўнг 1980—1985 йиллар собиқ Тошкент давлат университетининг фалсафа-иқтисод факультети сиёсий иқтисод йўналишида ўқиган. Соҳаси бўйича бир қанча ташкилотларда фаолият юритган.
«Шум бола» фильмида Қоравой образини яратган актёр Абдурайим Абдуваҳобов ҳам 2020 йилнинг июль ойида вафот этган эди.
Изоҳ (0)