“Faridaning ikki ming qo‘shig‘i” filmi premyerasi 17-dekabr kuni bo‘lib o‘tadi. Premyera 15—18-dekabr kunlari Toshkent shahrida o‘tkaziladigan “O‘zbekistonning madaniy merosi — yangi Renessans poydevori” an’anaviy madaniy meros haftaligi doirasida o‘tkazilishi ko‘zda tutilgan.
Haftalikning ilk kuni Yoshlar ijod saroyida IV Xalqaro kongress tashkil etiladi. Ushbu kongressda rasmiy doiralar va xalqaro tashkilotlar vakillari, 40 dan ortiq mamlakatlardan kelgan 300 dan ortiq mutaxassis va ekspertlar ishtirok etadi. Shuningdek, 1000 dan ziyod olimlar va boshqa nufuzli mehmonlar qatnashadi. “O‘zbekistonning madaniy merosi — yangi Renessans poydevori” IV Kongressining ikki kuni xorijiy olimlarning O‘zbekiston madaniy boyliklarini tadqiq qilish haqidagi ma’ruzalariga bag‘ishlanadi.
Kongressning uchinchi kuni, 17-dekabrda esa O‘zbekiston milliy kinematografiyasiga bag‘ishlanadi. Aynan shu kuni “O‘zbekkino” Milliy agentligi buyurtmasiga binoan suratga olingan, O‘zbekiston “Oskar” qo‘mitasi tomonidan “Oskar—2020” mukofotiga nomzod qilib ko‘rsatilgan rejissor Yolqin To‘ychiyevning “Faridaning ikki ming qo‘shig‘i” badiiy filmi namoyish etiladi. Film, shuningdek, “Moskva premyerasi” xalqaro festivalida Gran-pri mukofotini qo‘lga kiritdi, “Oltin globus” sovrinining “Eng yaxshi xorijiy film” nominatsiyasiga da’vogarlar ro‘yxatidan joy oldi.
Filmda o‘tgan asrning boshlarida Turkistonda yuz bergan siyosiy voqealarning shu yurt aholisiga ko‘rsatgan ta’siri bir oila misolida ochib beriladi.
Ssenariy muallifi va rejissor — Yolqin To‘ychiyev, postanovkachi operator — Bahodir Yo‘ldoshev, postanovkachi rassom — Bektosh Rajabov, film direktori — Shavkat Rizayev. Rollarda — Bahrom Matchonov, Yulduz Rajabova, Elmira Rahimjonova, Marjona O‘ljayeva, Sanobar Haqnazarova, Nodira Hojiquliyeva va boshqalar.
Haftalik Toshkent shahridagi Yoshlar ijod saroyida o‘tkaziladi.
Reklama huquqi asosida
Izoh (0)