Eronda xorijiy razvedka xizmatlari bilan hamkorlik qilganlikda ayblanib sudlangan muxolifat jurnalisti Ruhollah Zam qatl etildi, deya xabar qilmoqda Meduza.
Zam Oliy sud uning jazosini yengillashtirish va ishni qayta ko‘rib chiqishni rad etgandan to‘rt kun o‘tib 12-dekabr kuni ertalab osib o‘ldirilgan.
Zam Eronning eng taniqli muxolifat faollaridan biri va mamlakatdagi yuqori lavozimli amaldorlarga qarshi ayblov dalillarini nashr etgan Amad News Telegram kanalining asoschisi edi. Kanal Eronda 2017-yilda bo‘lib o‘tgan norozilik namoyishlarini faol ravishda yoritib borgan.
Eron sudi Zamni hukumatga qarshi faoliyat hamda AQSh, Fransiya va Isroil razvedka xizmatlari bilan hamkorlikda aybdor deb topdi. Eron rasmiylariga ko‘ra, jurnalist o‘z postlarida o‘quvchilarni tartibsizliklarda qatnashishga chaqirgan.
Zam bir necha yil Fransiyada yashab, u yerda siyosiy boshpana olgan. 2019-yilda u Islom inqilobi soqchilari korpusi tomonidan o‘g‘irlab Eronga olib ketilgan. Taxminlarga ko‘ra, uni Iroqda o‘g‘irlashgan. Ma’lum qilinishicha, Zamni mahalliy faollardan biri Iroqqa eksklyuziv intervyu olish taklifi bilan aldab chaqirgan.
Avvalroq Eron hukumati yadroshunos olimning o‘ldirilishiga aloqador shaxslar qo‘lga olinganini ma’lum qilgani, Eronda “Al-Qoida” yetakchilaridan biri yo‘q qilingani hamda turkiyalik inson huquqlari faoli Ebru Timtik 238 kunlik ochlik e’lonidan so‘ng vafot etgani haqida xabar berilgandi.
Izoh (0)