Shavkat Mirziyoyev Urganchdagi “UzXCMG” qo‘shma korxonasida amalga oshirilayotgan loyihalar bilan tanishdi, deya xabar qilmoqda Prezident matbuot xizmati.
Ma’lum qilinishicha, ushbu korxona 2014-yilda faoliyat boshlagan. Endilikda uni 3 bosqichda rivojlantirish rejalashtirilgan. Dastlab qishloq xo‘jaligi texnikalarini yirik bo‘g‘inli yig‘ish, ikkinchi pallada sanoat usulida yig‘ish, uchinchisida esa ishlab chiqarishni mahalliylashtirish mo‘ljallangan.
Shu maqsadda 2020-yilda Xitoyning “XCMG” korporatsiyasidan 4,3 million dollarlik texnologik yig‘uv liniyasi va uskunalar olib kelingan. Mazkur energiya tejamkor texnologiya mahsulot tannarxi pasayib, raqobatbardoshligi oshishiga xizmat qiladi. Import detallar o‘rni to‘ldirilib, mahalliylashtirish darajasi 2021-yilda 51 foizga yetkaziladi. Shuningdek, hozir bu yerda 30 kishi mehnat qilayotgan bo‘lsa, kelgusida yana 60 ta ish o‘rni yaratiladi.
Davlat rahbari qishloq xo‘jaligi mashinalari yig‘uv-payvandlash uskunalarini, mahalliylashtirilgan texnika va ehtiyot qismlarni ko‘zdan kechirdi.
“Bu zavodning imkoniyatlari juda katta. Lekin ularni ishlatolmayapmiz. Shuning uchun bu yerda yana nimalar chiqarish mumkinligini va kelgusi yillarda chet eldan qanday texnikalar sotib olishga ehtiyoj borligini chuqur tahlil qilib, ularni shu yerga buyurtma berish, imkonsizlarini kooperatsiya asosida tayyorlash zarur. Bu zavod rivojlanib, Xorazm industriyasiga asos bo‘lishi kerak”, – dedi Shavkat Mirziyoyev.
Shu yerda Xorazmda ishlab chiqarilayotgan sanoat mahsulotlari ham ko‘zdan kechirildi.
Shavkat Mirziyoyevning Xorazm tashrifiga oid boshqa xabarlar:
- Shavkat Mirziyoyev beshinchi avlod texnologiyasiga ega zamonaviy issiqxonani borib ko‘rdi
- O‘zbekistonda endi tumanlardagi iqtisodiy kompleks xodimlari har bir mahallaga biriktirilib, o‘z sohasiga doir masalalarni hal qilib boradi
- Shavkat Mirziyoyev mahsulotlarining 75 foizi eksportga yo‘naltirilgan tekstil korxonasi bilan tanishdi
Izoh (0)