Shavkat Mirziyoyev Xorazmga safari davomida Urganchdagi texnoparkni borib ko‘rdi, deya xabar qilmoqda Prezident matbuot xizmati.
Qayd etilishicha, “Urganch” texnoparki 2020-yil may oyida foydalanishga topshirilgan edi. Qisqa vaqtda bu yerda ikkita korxona faoliyat boshladi. Ular kiyim-kechak ishlab chiqaruvchi “Oq oltin mega tekstil” hamda metaldan turli mahsulotlar tayyorlaydigan “Great Khorezm” shirkatlari hisoblanadi.
Prezident tekstil korxonasi mahsulotlarini ko‘zdan kechirdi.
Mazkur shirkatga Germaniya, Italiya, Turkiya kabi davlatlardan keltirilgan tikuvchilik dastgohlari o‘rnatilgan. Bolalar va kattalar kiyimlari, jinsi shim kabi 100 dan ortiq turdagi mahsulotlar ishlab chiqarilib, 75 foizi eksportga yo‘naltirilmoqda.
Korxonada Urganch va Xiva shaharlari, Yangiariq, Xonqa va Urganch tumanlaridan 400 nafar xotin-qiz mehnat qilmoqda. Davlat rahbari ular bilan suhbatlashdi.
“Sizlarni ko‘rganimdan, mana shunday hunar egallab, o‘zlaringga yoqqan fabrikada ishlayotganlaringdan xursandman. Odamlarni, ayniqsa, ayollar va yoshlarni ish bilan ta’minlash bo‘yicha katta harakatlar qilyapmiz. Bugun-erta Xorazmda yurib, mablag‘lar berib, rejalar tuzishdan maqsad ham shu”, – dedi Shavkat Mirziyoyev.
Prezident uyda o‘tirgan ayollarni kasanachilik asosida ham ishga jalb etish muhimligini ta’kidladi.
Bugungi kunda texnoparkning qolgan bloklariga ham uskunalar olib kelinmoqda. Majmua to‘liq ishga tushgach, yiliga qariyb 87 milliard so‘mlik mahsulot ishlab chiqarilishi, 5,8 million dollarlik eksport qilinishi mo‘ljallangan.
Shu yerda Xiva shahri va Gurlan tumani misolida infratuzilmani yaxshilab, turizm va tadbirkorlikni rivojlantirish, aholi bandligini ta’minlash, kambag‘allikni qisqartirish loyihalari muhokama qilindi.
Shavkat Mirziyoyevning Xorazm tashrifiga oid boshqa xabarlar:
Izoh (0)