Tesla’ning Germaniyadagi zavodini qurish ishlari ilonlar va chaqqon kaltakesaklar sabab to‘xtatildi

Tesla Motors kompaniyasi Germaniyadagi yangi zavodini qurish uchun mo‘ljallangan hududdagi daraxtlarni kesishni to‘xtatdi, deb xabar beradi Autonews.

Bu qaror Frankfurt-na-Odere sudi tomonidan mahalliy ekologlar da’vosiga ko‘ra qabul qilingan. Ekologlarning ta’kidlashicha, ushbu o‘rmon hududida ilonlar va kaltakesaklar qishlaydi.

Sudga “Tabiat va biologik xilma-xillikni qo‘riqlash ittifoqi” (NABU) va “Yashil liga” vakillari murojaat qilgan. Ekologlarning hisoblashicha, Berlin yaqinida joylashgan hududdagi daraxtlarni kesish mahalliy zaharsiz tangailon va chaqqon kaltakesaklarning qirilib ketishiga olib kelishi mumkin.

O‘tgan hafta Tesla qo‘shimcha ravishda yana 83 gektar maydondagi qarag‘aylarni kesishga ruxsat olgan bo‘lib, amerikaliklar bu yerda ombor va kanalizatsiya kommunikatsiyalarini qurishni rejalashtirgan. Shuningdek, Tesla’ning ma’lum qilishicha, ushbu hududdagi barcha hayvonlar ushlanib, boshqa joyga ko‘chirilgan. Biroq NABU rahbari Kristian Shrederning ta’kidlashicha, buning “mutlaqo imkoni yo‘q”. Shuningdek, ekolog o‘rmondagi daraxtlarning kesilishi hatto loyiha hududiga kirmaydigan tabiat zonalariga ham ta’sir ko‘rsatishini qayd etgan.

Tesla Motors 2020-yil boshidan “Gigafabrika 4” nomini olgan Yevropadagi birinchi zavodini qurishga faol kirishgan. Zavod Berlin yaqinida joylashgan bo‘lib, u 300 gektar hududni egallaydi — bu 420 ta futbol maydoniga teng demak.

To‘rtinchi “Gigafabrika”ning qurilishi boshlanganidayoq qator qiyinchiliklar yuzaga kelgan. Masalan, yanvar oyida ishlar Ikkinchi jahon urushiga tegishli o‘nlab portlamay qolgan snaryadlar sabab to‘xtatilgan edi. Keyinroq esa mahalliy “yashil” faollar ommaviy norozilik namoyishlarini o‘tkaza boshlagan. Tesla rahbariyati zavod hududining atrofiga kesilganidan uch barobar ko‘proq daraxt ekishga va’da bergan, biroq ekologlar hayvonlarni qutqarib qolishning imkoni yo‘qligini ta’kidlamoqda. Fevral oyida ekologlar sud orqali Tesla’ga o‘rmondan yo‘qolib ketish xavfi ostida turgan chumolilar, sudraluvchi va ko‘rshapalaklarni ko‘chirish majburiyatini yuklagan edi.