Moddiy madaniy meros ko‘chmas mulk obyektlarining milliy ro‘yxatiga kiritilgan, Toshkentdagi 1947-yilda qurilgan kurantlarni dekorativ bezash ishlari Madaniyat vazirligi huzuridagi Madaniy meros departamentining ruxsatisiz amalga oshirilgan, deb xabar beradi “Anhor.uz”.
“Gazeta.uz”ning yozishicha, Instagram’dagi “Kurantlar” kafe-barining sahifasida 26-noyabr kuni to‘q qizil lenta va bantlar bilan bezatilgan kurantlarning surati paydo bo‘lgan. “Kirib kelayotgan Yangi yilingiz bilan, hamshaharlar! Ko‘proq tabassum qiling”, — deyiladi postda.
Ijtimoiy tarmoq foydalanuvchilari ushbu dekoratsiyaga turlicha munosabat bildirgan: ayrimlarga bu yoqqan bo‘lsa, boshqalar “tarixni tahqirlash” deya buni didsizlik deb atagan.
Eslatib o‘tamiz, 2018-yilning noyabrida poytaxt aholisining ko‘pchiligi tarixiy binoda “Kurantlar” kafe-barining ochilishiga nisbatan norozilik bildirgandi. Xususan, ko‘pchilik qoraytirilgan vitrinalar o‘rnatilishiga qarshi chiqqan.
O‘sha vaqtda Toshkent shahri hokimi vazifasini bajaruvchi bo‘lgan Jahongir Ortiqxo‘jayev bu kabi qo‘shimcha qurilmalar olib tashlanishini va’da bergandi.
Madaniy meros departamentining ma’lum qilishicha, Vazirlar Mahkamasining 2019-yil 30-martdagi (265-sonli) qaroriga binoan madaniy meros obyektlari va ularning muhofaza qilinadigan hududlarida tuproq ishlari, qurilish, melioratsiya va boshqa tadbirlar faqat departament huzuridagi Ilmiy ekspert kengashi tomonidan ko‘rib chiqilgandan so‘ng amalga oshiriladi.
Madaniy meros departamentining Toshkent shahri bo‘yicha hududiy boshqarmasi 27-noyabr kuni Mirobod tuman hokimligi va Binolarni foydalanishga topshirish departamentiga “Toshkent kurantlariga noqonuniy o‘rnatilgan elementlarni olib tashlash bo‘yicha ogohlantirish xatini yuborgan”.
Ma’lumot uchun, Toshkent kurantlari Ikkinchi jahon urushida fashistlar ustidan qozonilgan g‘alabaning 2 yilligi sharafiga ochilgan, ya’ni 1947-yilning 9-mayidan bong ura boshlagan. Minora ustidagi soat mexanizmini Belarus frontida jang qilgan toshkentlik soatsoz usta Aleksandr Ayzenshteyn Sharqiy Prussiyaning Allenshteyn (hozirgi Polshaning Olshtino) shahridan keltirgan.
Bir guruh soatsoz ustalar ushbu mexanizmni 4 siferblatli qilib minora ustiga o‘rnatgan. Minoraning balandligi 28,7 metr, o‘lchovi 4,1x4,1 metrdan iborat. Binoning qurilishiga me’mor A.Muhammedshin va bosh muhandis V.Levchenko boshchilik qilgan. Kurant mashhur ganch ustasi, rassom-naqqosh, me’mor, O‘zbekiston fanlar akademiyasi a’zosi Usta Shirin Murodovning faol ishtiroki bilan o‘ziga xos uslubda bezatilgan.
Izoh (0)