Моддий маданий мерос кўчмас мулк объектларининг миллий рўйхатига киритилган, Тошкентдаги 1947 йилда қурилган курантларни декоратив безаш ишлари Маданият вазирлиги ҳузуридаги Маданий мерос департаментининг рухсатисиз амалга оширилган, деб хабар беради «Anhor.uz».
«Gazeta.uz»нинг ёзишича, Instagram’даги «Курантлар» кафе-барининг саҳифасида 26 ноябрь куни тўқ қизил лента ва бантлар билан безатилган курантларнинг сурати пайдо бўлган. «Кириб келаётган Янги йилингиз билан, ҳамшаҳарлар! Кўпроқ табассум қилинг», — дейилади постда.
Ижтимоий тармоқ фойдаланувчилари ушбу декорацияга турлича муносабат билдирган: айримларга бу ёққан бўлса, бошқалар «тарихни таҳқирлаш» дея буни дидсизлик деб атаган.
Эслатиб ўтамиз, 2018 йилнинг ноябрида пойтахт аҳолисининг кўпчилиги тарихий бинода «Курантлар» кафе-барининг очилишига нисбатан норозилик билдирганди. Хусусан, кўпчилик қорайтирилган витриналар ўрнатилишига қарши чиққан.
Ўша вақтда Тошкент шаҳри ҳокими вазифасини бажарувчи бўлган Жаҳонгир Ортиқхўжаев бу каби қўшимча қурилмалар олиб ташланишини ваъда берганди.
Маданий мерос департаментининг маълум қилишича, Вазирлар Маҳкамасининг 2019 йил 30 мартдаги (265-сонли) қарорига биноан маданий мерос объектлари ва уларнинг муҳофаза қилинадиган ҳудудларида тупроқ ишлари, қурилиш, мелиорация ва бошқа тадбирлар фақат департамент ҳузуридаги Илмий эксперт кенгаши томонидан кўриб чиқилгандан сўнг амалга оширилади.
Маданий мерос департаментининг Тошкент шаҳри бўйича ҳудудий бошқармаси 27 ноябрь куни Миробод туман ҳокимлиги ва Биноларни фойдаланишга топшириш департаментига «Тошкент курантларига ноқонуний ўрнатилган элементларни олиб ташлаш бўйича огоҳлантириш хатини юборган».
Маълумот учун, Тошкент курантлари Иккинчи жаҳон урушида фашистлар устидан қозонилган ғалабанинг 2 йиллиги шарафига очилган, яъни 1947 йилнинг 9 майидан бонг ура бошлаган. Минора устидаги соат механизмини Беларусь фронтида жанг қилган тошкентлик соатсоз уста Александр Айзенштейн Шарқий Пруссиянинг Алленштейн (ҳозирги Польшанинг Олштино) шаҳридан келтирган.
Бир гуруҳ соатсоз усталар ушбу механизмни 4 циферблатли қилиб минора устига ўрнатган. Миноранинг баландлиги 28,7 метр, ўлчови 4,1х4,1 метрдан иборат. Бинонинг қурилишига меъмор А.Муҳаммедшин ва бош муҳандис V.Левченко бошчилик қилган. Курант машҳур ганч устаси, рассом-наққош, меъмор, Ўзбекистон фанлар академияси аъзоси Уста Ширин Муродовнинг фаол иштироки билан ўзига хос услубда безатилган.
Изоҳ (0)