Metall bloklar, LED-chiroqlar, ko‘zgu va haqiqiy archa shoxlariga ega noodatiy installyatsiya-archa Yevropadagi eng chiroyli archa nomiga sazovor bo‘ldi, deb xabar qiladi Hi-Tech.Mail.ru.
Noodatiy archa Vilnyusga (Litva) o‘rnatilgan. European Best Destinations turistik tashkilotining ma’lumotlariga ko‘ra, u Yevropadagi eng yaxshi archaga aylangan. Qiziq jihati, ushbu archani an’anaviy daraxt deb bo‘lmaydi — unda faqat archaning haqiqiy shoxlari mavjud xolos, biroq asosini metall bloklar, LED-chiroqlar va ko‘zgular tashkil etadi.
Balandligi 24 metrga teng archa shunday loyihalashtirilganki, uning ichiga kirish mumkin. “Aytishlaricha, uning ichida installyatsiya, bezaklar ilingan oddiy shoxlar yaxshi ko‘rinadi va ignabargli daraxt hidi sezilib turadi”, — deyiladi xabarda.
Archaga biror o‘yinchoq ilinmagan bo‘lsa-da, u baribir juda chiroyli: chiroqlar pirpirab, porlab va rangini o‘zgartirib turadi. Archani uzoqdan ham tomosha qilish oson bo‘lishi uchun maxsus shunday ishlangan. Bu odamlarga bayram yaqinlashayotganini his qilish, ijtimoiy masofalanishga rioya qilgan holda uzoqdan kuzatish imkonini beradi.
Avvalroq Toshkent shahrida ham mamlakat bosh archasini o‘rnatish, bezatish, Yangi yil bayrami uchun tayyorgarlik ishlari boshlangani to‘g‘risida xabar berilgandi.
Izoh (0)