Металл блоклар, LED-чироқлар, кўзгу ва ҳақиқий арча шохларига эга ноодатий инсталляция-арча Европадаги энг чиройли арча номига сазовор бўлди, деб хабар қилади Hi-Tech.Mail.ru.
Ноодатий арча Вильнюсга (Литва) ўрнатилган. European Best Destinations туристик ташкилотининг маълумотларига кўра, у Европадаги энг яхши арчага айланган. Қизиқ жиҳати, ушбу арчани анъанавий дарахт деб бўлмайди — унда фақат арчанинг ҳақиқий шохлари мавжуд холос, бироқ асосини металл блоклар, LED-чироқлар ва кўзгулар ташкил этади.
Баландлиги 24 метрга тенг арча шундай лойиҳалаштирилганки, унинг ичига кириш мумкин. «Айтишларича, унинг ичида инсталляция, безаклар илинган оддий шохлар яхши кўринади ва игнабаргли дарахт ҳиди сезилиб туради», — дейилади хабарда.
Арчага бирор ўйинчоқ илинмаган бўлса-да, у барибир жуда чиройли: чироқлар пирпираб, порлаб ва рангини ўзгартириб туради. Арчани узоқдан ҳам томоша қилиш осон бўлиши учун махсус шундай ишланган. Бу одамларга байрам яқинлашаётганини ҳис қилиш, ижтимоий масофаланишга риоя қилган ҳолда узоқдан кузатиш имконини беради.
Аввалроқ Тошкент шаҳрида ҳам мамлакат бош арчасини ўрнатиш, безатиш, Янги йил байрами учун тайёргарлик ишлари бошлангани тўғрисида хабар берилганди.
Изоҳ (0)