Qirg‘iziston o‘z hududiga barcha mamlakatlar fuqarolari uchun kirish huquqini berdi, deb xabar berdi mamlakat Tashqi ishlar vazirligi.

Foto: Qirg‘iziston Sog‘liqni saqlash vazirligi

Ma’lum qilinishicha, Qirg‘iziston hukumati 2020-yil 4-dekabrda Manas, O‘sh, Issiqko‘l xalqaro aeroportlari orqali Qirg‘izistonga kelgan xorijiy davlat fuqarolari va fuqaroligi bo‘lmagan shaxslarni mamlakatga qabul qilishni qayta tiklash to‘g‘risida qaror qabul qildi.

Unga ko‘ra, xorijiy davlatlarning fuqarolari va fuqaroligi bo‘lmagan shaxslar so‘nggi 72 soat ichida PZR usulida topshirilgan, manfiy natijadagi koronavirus test tahlili taqdim etilgandan keyingina Qirg‘izistonga yo‘naltirilgan samolyot bortiga chiqishiga ruxsat etiladi.

Qirg‘izistonga yetib kelganidan so‘ng sanitariya-karantin punktlari xodimlari PZR testi natijalari va samolyot bortidagi yo‘lovchilarning tana haroratini tekshiradi.

Koronavirusning birinchi holatlari Qirg‘izistonda mart oyida aniqlangan, shu oyda respublika o‘z chegaralarini chet elliklar va fuqaroligi bo‘lmagan shaxslar uchun yopgan. Keyinchalik nisbatan barqaror epidemiologik vaziyatga ega bo‘lgan bir qator davlatlarning fuqarolariga mamlakatga kirish huquqi berildi.

Jons Hopkins universiteti ma’lumotlariga ko‘ra, Qirg‘izistonda koronavirus bilan kasallanganlar soni 74 744 kishini tashkil qilmoqda. Ularning 1290 nafari vafot etgan.

Avvalroq O‘zbekiston Qirg‘izistonga yana 200 o‘ringa mo‘ljallangan tibbiyot konteynerlarini yetkazib bergani, Rossiya Qirg‘izistonga moliyaviy yordamni qayta tiklagani hamda Qirg‘iziston Parlamenti spikeri shifokorlar statistika uchun COVID-19’dan o‘limlar sonini yashirganini oshkor etgani haqida xabar berilgandi.