Qirg‘iziston parlamenti spikeri shifokorlar statistika uchun COVID-19’dan o‘limlar sonini yashirganini oshkor etdi

Qirg‘iziston parlamenti spikeri Kanat Isayev shifokorlar pandemiya paytida statistikani kamaytirib ko‘rsatish uchun COVID-19’dan o‘limlar sonini yashirganini ma’lum qildi. “Kabarlar”ning yozishicha, bu haqda u parlament yig‘ilishida Mehnat va ijtimoiy rivojlanish vaziri lavozimiga nomzodi ko‘rsatilgan Aida Ismoilovaga qarata murojaat qilganida aytgan.

“Bosh vazir o‘rinbosari bo‘lgan paytingizda qirg‘iz xalqi pandemiyaga duchor bo‘ldi. Ushbu kasallik tufayli qancha odam vafot etdi? Davolash protokoli bir necha marta o‘zgartirildi. Bu kasallik avval mamlakatimizda aniqlangan bo‘lsa, boshqa gap edi. Axir hammasi Xitoyda boshlandi, keyin Italiya va Rossiyada tarqaldi. Noto‘g‘ri davolash oqibatida mingdan ortiq fuqarolarimizni yo‘qotdik. Menda shifokorlar koronavirusdan o‘limni yashirib, odamlar yurak xastaligi tufayli vafot etgan, deb yozishgani haqida aniq ma’lumot bor. Statistikani kamaytirib ko‘rsatish maqsadida shunday qilishgan. Dalillar bor”, — degan Isayev.

Shuningdek, Aida Ismoilova bosh vazir bo‘lgan hukumat aybi bilan kasallik shu darajaga kelganligini ta’kidlagan.

Eslatib o‘tamiz, O‘zbekistonda ham so‘nggi vaqtlarda o‘lim va kasallanganlar bo‘yicha real raqamlar xususida ishonchsizlik keltirib chiqarayotgan holatlar kuzatilgandi. Xususan, Korrupsiyaga qarshi kurashish agentligi direktori Akmal Burhonov Samarqandda koronavirusdan davolanayotganlar rasmiy statistikasi 10 baravar kamaytirib ko‘rsatilganini aytgan. “Yuksalish” umummilliy harakati koronavirus statistikasi ishonchliligi, testlar, shuningdek, COVID-19’ga qarshi kurash bo‘yicha maxsus shtabning “noma’lum” tarkibli mutaxassislari va qabul qilinayotgan qarorlarning samaradorligi yuzasidan mas’ullarga bir nechta savollar bilan yuzlangan.

O‘zbekiston Sog‘liqni saqlash vazirligi rasmiylari esa davlat koronavirus statistikasiga doir ma’lumotlarni yashirish yoki ularni buzib ko‘rsatishdan manfaatdor emasligini ta’kidlagan. Shunga qaramay, SSV tomonidan yuritilayotgan statistika shubhali va ishonchga sazovor emasligi haqida “Daryo” bir necha bor chiqish qilgan.

Faol jamoatchilik tomonidan yuritilayotgan o‘lim statistikasi vazirlik statistikasidan tobora farq qila boshlashi fonida vazirlik vafot etganlarning ism-familiyasi bosh harflari, jinsi, yoshi, qayerda yashagani haqidagi ma’lumotlarni e’lon qilishni ham to‘xtatgandi.