Shimoliy Koreyada karantin qoidalarini buzgan erkak omma oldida otib o‘ldirildi

Shimoliy Koreyada bir erkak “favqulodda karantin choralarini” buzganligi sababli omma oldida qatl etildi. Bu odamlarni qo‘rqitish va ularni COVID-19 sababli karantinga qat’iy amal qilishga majburlash maqsadida qilingan. Bu haqda “Korrespondent.net” xabar berdi.

Rasmiylar KXDRda koronavirus bilan kasallanish holatlari mavjud emasligini da’vo qilishiga qaramasdan, Koreya ishchilar partiyasining Markaziy qo‘mitasi karantin choralarini “o‘ta yuqori darajadagi favqulodda karantin choralari” darajasiga oshirdi. Bu haqda Xitoy bilan chegarada joylashgan Shimoliy Pyongan viloyatining fuqarosi RFA nashri manbasiga gapirib bergan.

“Ular chegara zonasida mahalliy aholini qo‘rqitish uchun o‘q otish bilan omma oldida qatl uyushtirdi, chunki chegaraning narigi tomonida odamlar bilan juda ko‘p aloqa bo‘lgan, shu qatorda ko‘plab kontrabanda bo‘lgan”, — deydi manba.

Qatl etilgan 50 yoshli erkak karantinni buzganlik va Xitoydan noqonuniy ravishda kontrabanda olib kelganlikda ayblangan. U 28-noyabr kuni otib tashlangan.

Manba omma oldidagi qatlga guvoh bo‘lmagan, ammo uni qatl marosimida qatnashganlardan biri bilan muhokama qilgan.

“Har doim odamlar tirikchilik uchun zarur narsa yetishmayotganidan shikoyat qilsa, hukumat ularni qatl etish yoki siyosiy qamoq lagerlariga jo‘natish bilan tahdid qilib, ularning ovozini o‘chirishga harakat qiladi”, — deb yozgan RFA o‘z manbasiga asoslanib.

Avvalroq Shimoliy Koreyada kamida ikki nafar amaldor COVID-19 koronavirus pandemiyasi sabab yuzaga kelgan iqtisodiy tanglik tufayli qatl qilingani haqida xabar berilgandi.