5-dekabr Moskva vaqti bilan soat 11:00 holatiga ko‘ra, Rossiyada yana 28 782 kishida koronavirus tasdiqlandi, deb xabar beradi Meduza. Bu mamlakatda pandemiya boshlanganidan buyon qayd etilgan eng yuqori ko‘rsatkich hisoblanadi. Bundan bir kun oldin 27 403 kishida COVID-19 aniqlangan edi. Rossiyada hozirga qadar koronavirusga chalinganlar soni 2 431 731 kishiga yetgan.
Kasallanish holatlari asosan Moskva (7993 kishi), Sankt-Peterburg (3726), Moskva (1246) va Nijegorodsk (495 kishi) viloyatlarida qayd etilgan.
O‘tgan bir sutka ichida 508 kishi koronavirus infeksiyasi qurboniga aylangan. Tezkor shtab ma’lumotlariga ko‘ra, hozirga qadar Rossiyada koronavirus oqibatida vafot etganlar soni 42 684 kishini tashkil etmoqda.
Shuningdek, bir sutka ichida bemorlarning 27 644 nafari sog‘aygan — hozirga qadar sog‘ayganlar soni 1 916 396 kishiga yetdi.
“Rospotrebnadzor” ma’lumotlariga ko‘ra, mamlakatda koronavirusni aniqlash uchun so‘nggi 24 soatda 550 mingta test o‘tkazilgan.
Avvalroq Rossiyada pandemiya boshlanganidan buyon ortiqcha o‘lim holati 120 ming kishini tashkil etgani, bu tezkor shtabning COVID-19 borasidagi ma’lumotlaridan to‘rt barobarga ko‘p ekanligi haqida xabar berilgandi. Keyinroq bosh vazir o‘rinbosari Tatyana Golikova holatga izoh berib, “Rosstat”ning koronavirus bilan bog‘liq o‘lim statistikalari ishonchli ekanligini aytgan.
Izoh (0)