Вазирлар Маҳкамасининг «Аҳолининг соғлом турмуш тарзини қўллаб-қувватлаш ва жисмоний фаоллигини оширишга доир қўшимча чора-тадбирлар тўғрисида»ги қарори қабул қилинди, дея хабар бермоқда «Kun.uz».
Қарорга мувофиқ:
- Халқ таълими вазирлиги Жисмоний тарбия ва спорт вазирлиги билан биргаликда ҳудудларнинг ўзига хос хусусиятлари, аҳолининг қизиқиши ва хоҳиш-истакларидан келиб чиқиб, умумтаълим мактабларини камида биттадан устувор, истиқболли, ривожланаётган, шу жумладан миллий спорт турларига ихтисослаштиради;
- умумтаълим мактабларининг спорт турларига ихтисослашувидан келиб чиқиб, уларнинг ҳар бирида ҳар ойда камида битта спорт тури бўйича спорт мусобақалари ўтказилишини таъминлайди.
Ички ишлар вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:
а) икки ой муддатда пиёдалар ўтиш йўлакларида йўл-транспорт ҳодисаларининг сонини кескин қисқартириш, шунингдек, аҳолининг пиёда юриши учун қулайликлар яратиш мақсадида барча кўчаларда ўрнатилган светофорларнинг рухсат берувчи чироқлари вақти оралиғини халқаро стандартлар асосида қайта кўриб чиқиб, пиёдалар ўтиш йўлакларида, шу жумладан, тартибга солинмаган серқатнов пиёдалар ва велосипедда ҳаракатланувчилар учун ўтиш йўлларида махсус светофорлар (тугмачалар орқали бошқариладиган) ўрнатилишини, пиёдалар ўтиш жойларининг (зебра) халқаро тажрибадан келиб чиқиб ташкил этилишини таъминлайди;
б) 2021 йил 1 апрелга қадар маҳаллалар, қишлоқлар, туманлар, шаҳарлардаги пиёда ва велосипедда юриш учун мўлжалланган «Саломатлик йўлаклари»га автомобиль қўйишни тақиқловчи белгиларни, йўлакларнинг бошланиш қисмига автомобилларнинг ҳаракат қилишининг олдини олиш мақсадида махсус тўсиқларни ўрнатади, бунда тўсиқлар пиёда юриш ва велосипедда ҳаракатланишга халақит бермайдиган бўлиши инобатга олинади.
в) пиёда ва велосипедда юриш учун мўлжалланган «Саломатлик йўлаклари»да автомобиль ҳаракатланишини ва у ерга автомобиль қўйиб кетишнинг олдини олиш назоратини кучайтиради ҳамда бу ишларни доимий равишда амалга оширади;
г) Халқ таълими вазирлиги, Олий ва ўрта махсус таълим вазирлиги билан биргаликда ўқувчилар ва талабалар ўртасида велосипедда тўғри ҳаракатланиш, белгиланган йўлаклардан ташқарида ҳаракатланмаслик, йўл қоидаларига қатъий риоя қилиш бўйича умумтаълим мактаблари, профессионал ва олий таълим муассасаларида йўл ҳаракати ходимлари иштирокида дарс ўтиш ҳамда ўқув қўлланмалар ва буклетлар тайёрлаб ўқувчи ва талабаларга тарқатиш бўйича чора-тадбирлар белгилайди.
2020 йил 1 декабрдан барча давлат органлари ва ташкилотлари ҳамда маҳаллий давлат ҳокимияти органлари:
- биринчи раҳбарлар ва ўринбосарларига «Шахсий намуна» тамойили асосида танланган кунларда (ҳафтада камида бир марта) хизмат автомобилларидан фойдаланмаган ҳолда велосипедда ёки пиёда ишга келиши ва кетиши;
- иш жойига яқин масофада яшайдиган ишчи ходимларнинг велосипедда ёки пиёда ишга келиши ва кетиши тавсия қилинди.
а) 2020 йил 1 декабрга қадар «Саломатлик йўлаклари»ни ташкил этишда маҳаллалар, қишлоқлар, туманлар ва шаҳарлардаги барча мавжуд пиёда ва велосипедда юриш йўлакларининг ҳолатини инвентаризация қилади.
Бунда, «Саломатлик йўлаклари»ни ташкил этишни биринчи навбатда яхши ҳолатда бўлган мавжуд пиёда ва велосипедда юриш йўлакларига тегишли чизмалар чизиш, ахборот кўрсаткичлари ва белгилар ҳамда ёритиш тизимларини ўрнатиш, текис ва тўсиқсиз ҳаракат қилиш имконини яратиш ҳамда зарур ҳолларда янги йўлаклар ташкил этилишига эътибор қаратилади;
б) 2020 йил 10 декабрга қадар йиллар кесимида ҳар бир маҳалла, қишлоқ, туман ва шаҳарда «Саломатлик йўлаклари»ни ташкил этишнинг тармоқ жадвалини тасдиқлайди.
Ташкил этиладиган «Саломатлик йўлаклари» сифати устидан назорат олиб бориш мақсадида (ҳафтада камида бир марта) тегишли масъуллар иштирокида, ушбу йўлларда велосипедда ёки пиёда ҳаракатланиш белгиланди;
Қурилиш вазирлиги 2021 йил 1 январга қадар:
- «Саломатлик йўлаклари»ни барпо этишда «тўсиқсиз муҳит» ташкил этилиши, хусусан, йўлакларга турли тўсиқлар ўрнатилиши, қўшимча қурилишлар қурилмаслиги ва бошқалар бўйича амалдаги шаҳарсозлик нормаларига тегишли қўшимча ва ўзгартиришлар киритади;
- Жисмоний тарбия ва спорт вазирлиги билан бирга Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг қурилиш масалалари бўйича ўринбосарлари ҳамда бош архитекторларнинг «Саломатлик йўлаклари»ни тўғри ташкил этиш бўйича малакасини ошириш курсларини ташкил этади.
Аввалроқ Ўзбекистондаги раҳбарларга ҳафтада камида бир марта ишга хизмат автомобилисиз келиб-кетиши тавсия этилгани ҳамда 2021 йил июлдан бошлаб вазир ва ҳокимларнинг семизлик даражасини онлайн кузатиб бориш тизими йўлга қўйилиши ҳақида хабар берилганди.
Изоҳ (0)