Тошкент шаҳар маъмурий суди судьялари ва ёрдамчилари томонидан 5 мингга яқин сохта қарор чиқарилгани ва 8 миллиард сўм давлат маблағи талон-торож қилингани ҳақида аввалроқ хабар берилганди. Олий суди матбуот хизмати раҳбари Азиз Обидов мазкур ҳолат бўйича «Дарё»га изоҳ берди.
«Тошкент шаҳар маъмурий судининг бир нечта судьялари ва уларнинг ёрдамчилари Тошкент шаҳар Ички ишлар бош бошқармаси Йўл ҳаракати хавфсизлиги бошқармаси маъмурий амалиёт бўлими ходимлари билан олдиндан жиноий тил бириктирган. Улар йўл ҳаракати қоидалари бузилганлиги юзасидан тузилган маъмурий ишларни кирим қилмасдан, тарафлар иштирокида кўриб чиқмасдан ва айрим маъмурий ишларни қасддан йўқотиб, 5 мингга яқин сохта қарор чиқарган», — дея маълум қилганди Коррупцияга қарши курашиш агентлиги директори ўринбосари Умида Тўхташева.
Азиз Обидовнинг хабар беришича, жиноят ишлари бўйича Тошкент шаҳар судининг судьяси лавозимида ишлаган Д.Ш., жиноят ишлари бўйича Тошкент шаҳар судининг судьяси катта ёрдамчиси вазифасида ишлаган А.С., Яшнобод туман маъмурий судининг судья ёрдамчиси вазифасида ишлаган Б.Т., Тошкент шаҳар ИИББ ЙҲХБ ходимлари И.Ҳ., А.Т., Ш.М., Б.А., Т.Ҳ. ва У.С. Жиноят кодексининг 167-моддаси (ўзлаштириш ёки растрата йўли билан талон-торож қилиш) ва бошқа моддалари билан айбланмоқда.
Уларга оид жиноят иши ҳозирги кунда жиноят ишлари бўйича Зангиота тумани судининг иш юритувида бўлиб, ушбу ишни кўриш 2020 йил 11 декабрь куни бошланади.
Олий суд вакилининг маълум қилишича, мазкур жиноят иши юзасидан дастлабки тергов даврида аниқланган 3 353 456 647 сўм моддий зарардан 2 991 456 647 сўми қопланган.
Мавзуга доир:
Изоҳ (0)