Energetika vazirligi Qashqadaryo viloyatining Yakkabog‘ tumanida uch kun chiroq o‘chgani sabab 6 mingga yaqin tovuqning halok bo‘lishi elektr energiyasining o‘chirilishi bilan bog‘liq emasligini ma’lum qildi.
Avvalroq Yakkabog‘ tumanidagi qator parrandachilik fabrikasida sodir bo‘lgan hodisa elektr ta’minotining uzilishi bilan bog‘langan edi.
Energetika vazirligining aniqlashicha, “Kumush kuz fayzi” parrandachilik fabrikasi elektrdan faqat binolarni yoritish va shamollatish uchun foydalangan. Elektr energiyasini yetkazib berish bo‘yicha “Kumush kuz fayzi” MChJ va Yakkabog‘ tuman hududiy elektr ta’minoti korxonasi tomonidan 2020-yil 4-yanvarda 82-sonli tegishli shartnoma tuzilgan.
“Ushbu shartnomaga ko‘ra, elektr ta’minotida uzilish kuzatilgan hollarda sexning shamollatish tizimi dizel-generatori tomonidan amalga oshirilishi belgilangan. Biroq 19-noyabr kuni generatorning dizel (yozgi) yoqilg‘isi muzlab qolgani, ya’ni ushbu xo‘jalik yurituvchi subyekt kuz—qish davriga mos ravishda tayyorgarlik ko‘rmaganligi tufayli bu shart bajarilmagan”, deyiladi xabarda.
“Ammo bunda o‘zimizning ham kamchiligimiz bo‘lgan. Generatorimiz yonilg‘isi sifatsiz bo‘lgani sabab muzlagan va yonmagan. Oqibatda parrandalar saqlanadigan binodagi havoni tortib turadigan uskunamiz ishlamay qolgan. Tovuqlarning o‘zidan chiqadigan ammiak gazi toza havoga chiqarilmagani bois parrandalarimiz nobud bo‘lgan. Ammo 400 mingdan ortiq tovuqlarimiz bor. Umid qilamizki, bu zararni qoplaymiz”, — deya izoh bergan “Kumush kuz fayzi” MChJ rahbari Abdunabi G‘iyosov.
Shu bilan birga, tadbirkorning so‘zlariga ko‘ra, u bunga qiziqqan har bir kishiga ushbu holatlar haqida tushuntirib bergan va tovuqlarning halokatidan ko‘rilgan zarar elektr ta’minoti korxonasiga tegishli deyilgan ma’lumotlar yuzaga kelganidan hayratda qolgan.
Mavzuga doir:
Izoh (0)