Surxondaryoda 52 ming tonna paxta qo‘shib yozilgan bo‘lishi mumkin — bu viloyat rejasining 21,3 foiziga teng

Surxondaryo viloyatida paxta topshirish rejasiga 21,3 foiz paxta qo‘shib yozilgan bo‘lishi mumkin. Bu haqda “Kun.uz” viloyat prokuraturasining 2020-yil 30-oktabr sanasidagi № 11/1.1-20 sonli topshirig‘iga tayanib, xabar berdi.

Qishloq xo‘jaligi vazirligi hisobotiga ko‘ra, Surxondaryo viloyatida paxta xomashyosini topshirish bo‘yicha reja 82,3 foizga bajarilgan.

Viloyat prokurori o‘rinbosarlaridan biri imzolagan ushbu topshiriqda “Tahlillar, [Surxondaryo] viloyat bo‘yicha jami 52 121 tonna paxta xomashyosini qo‘shib yozish holatlariga yo‘l qo‘yilganligini ko‘rsatmoqda”, deya ta’kidlanadi.

Surxondaryo viloyatida 2020-yilda paxta xomashyosini tayyorlash bo‘yicha shartnomaviy reja 244 ming 800 tonna qilib belgilangan edi. Qo‘shib yozilgani taxmin qilinayotgan 51 121 tonna viloyat yillik paxta topshirish rejasining 21,3 foizini tashkil etadi.

Topshiriq matnida viloyat tumanlarida qanchadan paxta qo‘shib yozilganiga ham aniqlik kiritilgan. Jumladan:

• Qumqo‘rg‘on tumanida — 10 538 tonna;
• Angor tumanida — 9 488 tonna;
• Jarqo‘rg‘on tumanida — 9 183 tonna;
• Muzrabot tumanida — 8 526 tonna;
• Denov tumanida — 6 111 tonna;
• Oltinsoy tumanida — 1 470 tonna;
• Sho‘rchi tumanida — 1 716 tonna;
• Qiziriq tumanida — 1 477 tonna;
• Termiz tumanida — 1 470 tonna;
• Sariosiyo tumanida — 540 tonna;
• Uzun tumanida — 539 tonna;
• Sherobod tumanida — 508 tonna;
• Bandixon tumanida — 307 tonna paxta xomashyosini qo‘shib yozish holatlariga yo‘l qo‘yilgan.

Shuningdek, viloyatdagi 535 ta fermer xo‘jaliklari paxta xomashyosi tayyorlash va topshirish rejasini 50 foizga ham bajarmagani ayon bo‘lmoqda. Sherobod tumanida — 205 ta, Qiziriq tumanida — 166 ta, Sho‘rchi tumanida — 50 ta, Bandixon tumanida — 37 ta, Uzun tumanida — 29 ta, Denov tumanida — 19 ta, Angor tumanida — 13 ta, Jarqo‘rg‘on tumanida — 10 ta, Muzrabot va Oltinsoy tumanlarida 3 tadan fermer xo‘jaliklari amalda rejani 50 foizga ham uddalay olmagan.

Paxtachilik klasterlari hisoblanadigan “Shoshmoxkashob” MChJ, “Surxondaryo agro xizmat” MChJ, “Termiz Jayxun Cluster” MChJ, “Surxon sifat Tekstil” MChJ, “Инденим Кластер” MChJ, “Angor Surxon G‘ururi” MChJ, “Muzrabat Indenim klaster” MChJ, “Bandixon Agroxizmat” MChJ kabilarning hisobotlarida aslida terilmagan paxta xomashyosini qo‘shib yozishgani ham ma’lum bo‘lmoqda.

“Eng ajablanarlisi, yog‘ingarchilik kunlari ham Surxondaryoning paxta ‘xirmon’lariga xomashyo kirim qilingan”, — deyiladi xabarda.

Surxondaryodagi tuman prokurorlariga yo‘llangan topshiriqda qayd etilgan qonunbuzilish holatlari yuzasidan zudlik bilan prokuror nazorati hujjatlarini qo‘llab, amalga oshirilgan ishlar va ko‘rilgan choralar haqida viloyat prokuraturasiga 5-noyabrga qadar axborot berish so‘ralgan.

Qishloq xo‘jaligi vazirligi O‘zbekistonda 2020-yilda qancha paxta hosili yig‘ib olingani to‘g‘risida bergan ma’lumotiga ko‘ra, Surxondaryo viloyati eng yomon natijani qayd etgan. Bundan tashqari, Buxoro, Sirdaryo va Qashqadaryo viloyatlarida ham paxta rejasi bajarilmagan.