“Yuventus” — “Dinamo K” uchrashuvini ayol hakam boshqarib boradi. Bunaqasi YChL tarixida kuzatilmagan

UEFA matbuot xizmati Chempionlar Ligasi guruh bosqichi 5-tur uchrashuvlariga tayinlangan hakamlar ro‘yxatini taqdim etdi.

Unga ko‘ra, “Yuventus” va “Dinamo Kiyev” o‘rtasidagi uchrashuvni fransiyalik ayol hakam Stefani Frappar boshqarib boradi. Shu tariqa Frappar Chempionlar Ligasi o‘yinini boshqarib borgan tarixdagi ilk ayol hakamga aylanadi.

Unga qanotlarda hamyurtlari Hisham Zakrani va Mehdi Rahmuni yordam beradi. Yordamchi hakam Karim Abed. VAR’da esa Benua Miyo va Villi Dilajo (ikkisi ham fransiyalik) ishlaydi.

Eslatib o‘tamiz, Frappar avvalroq “Chelsi” va “Liverpul” o‘rtasidagi 2019-yilgi Yevropa Superkubogi uchrashuvini boshqarib borgandi. U 2019/20-yilgi mavsumdan buyon Liga 1 o‘yinlarida muntazam faoliyat yuritib keladi.

“Yuventus” — “Dinamo K” uchrashuvi Toshkent vaqti bilan 2-dekabrdan 3-dekabrga o‘tar kechasi 01:00 da start oladi.