Ўзбекистонда 2020 йил якунига қадар ижро ҳужжатлари бўйича давлат фойдасига 2 триллион сўм ундирилади. Бу ҳақда 28 ноябрь куни Бош прокурор Ниғматилла Йўлдошев раҳбарлигида ўтказилган видеоселектор йиғилишида маълум қилинди.
Йиғилиш ижтимоий аҳамиятга эга озиқ-овқат маҳсулотлари нархининг барқарорлигини таъминлаш борасида амалга оширилаётган ишлар, шунингдек, ижро ҳужжатлари бўйича ундирувни таъминлаш юзасидан ўтказилган.
Қайд этилишича, 2020 йил охиригача жами 5 триллион, шундан давлатга 2 триллон сўмлик ижро ҳужжатларини ундириш бўйича режа график тасдиқланган. 1—17 ноябрь кунлари қолдиқдаги ижро ҳужжатлари бўйича қарийб 323 миллиард сўм ундирилган.
Ўтган 8 кунда эса жами 1,3 триллион сўм, шундан давлат фойдасига 364,3 миллиард сўм ундирилиши таъминланган.
Йиғилишда ҳудудларда ижро ҳужжатлари бўйича ундирувни таъминлашда сусткашликка йўл қўяётган МИБнинг масъул ходимлари ҳам кескин танқид остига олиниб, ўз фаолиятида асосий эътиборни давлат ундирувига қаратиши лозимлиги тушунтирилган.
Ўз ўрнида, тадбирда хатланган мол-мулкларнинг сотилиши, жиноий жарималар ҳамда солиқ қарздорлигини ундириш борасидаги ишларни янада жадаллаштириш борасида аниқ топшириқлар берилган.
Изоҳ (0)