2020 йилнинг 1 май куни Сардоба сув омбори тўғонининг 6-пикет деворидан сув сизиб чиқишни бошлаб, тошқин юзага келган эди. Натижада Сирдарё вилоятининг Сардоба, Мирзаобод ва Оқолтин туманларида жами 4710 та хонадон зарар кўрганди.
Сирдарё вилояти ҳокимлиги ахборот хизматининг «Дарё»га маълум қилишича, бугунги кунгача 1850 та коттеж мукаммал таъмирланиб, ўз эгаларига топширилган. Яшаш хонадонига жиддий зарар етган фуқаролар учун жами 2640 та хонадонни ўз ичига олган 66 та кўп қаватли турар жой бунёд этилди. Олий Мажлис Қонунчилик палатасининг бир гуруҳ депутатлари ва Адлия вазирлиги вакилларидан иборат ишчи гуруҳ иштирокида мазкур уй-жойлар аҳолига адолатли ва шаффоф тарзда топширилиши таъминланмоқда.
Айни пайтга қадар ишчи гуруҳ томонидан 2 минг 932 та оиланинг уй-жой олиш масаласида қилган мурожаати қабул қилинди ва уларнинг барчаси бир ой давомида ўрганиб чиқилди. Маҳалла фаоллари, қўни-қўшниларнинг фикр-мулоҳазалари ва муносабатлари инобатга олинган ҳолда қуръа ташлаш йўли билан Мирзаобод, Сардоба ва Оқолтин туманларида жами 1842 та хонадон калити аҳолига берилди. Шундан 1753 та хонадон эгалари ўз уйларига кўчиб кирди. «Дарё» мухбири вилоятнинг ушбу ҳудудларида бўлиб, янги уй аъзосига айланган фуқароларнинг айримлари билан суҳбатлашди.
«Тикув машиналарим ҳам сувда оқиб кетди»
Рухсора Имомова оила аъзолари билан Сардоба туманининг сув босган ҳудудларидан бири «Юртдош» маҳалласида истиқомат қиларди. Самарқанд вилоятидан келин бўлиб тушган бу аёл май тонги воқеасини шундай хотирлайди:
«1 май куни ҳам одатдагидек жуда эрта уйғонгандик. Турмуш ўртоғим Тошкент шаҳрига ишлагани кетиш учун тайёргарлик кўриб, машина гаплашгани кўчага чиқиб кетганди. Орадан ҳеч қанча вақт ўтмай шум хабар билан уйга қайтиб келди: сув омборидан сув сизиб чиқяптикан. Бу хабар маҳалладошлар орасида жуда тез тарқалдики, барчани ваҳима босган, одамлар бир-бирини огоҳлантирарди. Паспорт ва пулларимизни ҳам олмай, устимиздаги кийимларимиз билан кўчага чиқдик ва катта йўл томон югурдик. Жонимиз омон қолганига шукр, дейман. Муҳими, яқинларимнинг барчаси соппа-соғ, қолган нарсалар меҳнат орқали топилади», — деди у.
Тикувчилик борасида кўп йиллик тажрибага эга, ўнлаб шогирдлар етиштирган Рухсора Имомова ҳозирда «Сардоба Оқсарой текстиль» МЧЖда фаолият юритмоқда.
«Талафотдан кейин бир неча ой қайнопамнинг хонадонида истиқомат қилдик. Маълум вақт ижара уйда ҳам кун кечирдик. Эски уйимизга жиддий зарар етгани учун ҳокимиятдагилар яроқсиз деб топишди ва ‘Дўстлик’ маҳалласида қурилган 1480 та кўп қаватли янги хонадонлардан бирини беришди. Кўчиб ўтганимизга ўн кундан ошди. Умр йўлдошим, уч нафар фарзандим ва қайнонам билан бирга яшаяпмиз. Ҳамма шароитлар етарли, иситиш ва ёруғлик тизими ҳам анча яхши.
Кўп йилдан бери тикувчилик билан шуғулланаман. Олдинги хонадонимизда ҳам буюртма асосида пардалар, келин сарполар тикардим. Маҳалладаги қизларга ҳунар сирларини ўргатиб, устозлик қилардим. Минг афсуски, учта тикув машинам ҳам сувда оқиб кетди. Битта машинам қизлик давримдан эсдалик бўлиб қолганди. Янги уйга кўчганимиздан кейин ушбу корхонага ишга кирдим. Бир ой давомида бизни қайта ўқитишди. Бу ерда қилган ишимиз ва хатти-ҳаракатимизга қараб маош олишимизни айтишди. Тикув машинасига яхши тушунганим учун атрофимдаги тикувчиларга ҳам билмаганларини ўргатиб турибман. Корхонада, кўриб турганингиздек, юзлаб хотин-қизлар ишлайди. Иш жойим уйимнинг ёнида, йўл кирага пул сарфламайман. Ишхонамиз тушлик беради», — деди моҳир тикувчи.
«Хоналар иссиқ, йўлларимиз асфальт»
Оқолтин ва Мирзаобод туманининг иккита маҳалласида яшовчи аҳолининг бошпанаси яроқсиз ҳолга келгани учун уларга 360 та хонадондан иборат 9 та кўп қаватли уй қурилди. Мирзаобод туманида жойлашган ушбу маҳаллага «Нурли келажак» номи берилди.
70 ёшни қаршилаган Йўлдошали ота Қўчқоровнинг оиласига ҳам замонавий хонадонлардан бири топширилди. Бир умр қишлоқ хўжалиги соҳасида трактор ҳайдаб, сувчи бўлиб ишлаган отахон бугун жуда хурсанд.
«Янги хонадонга 14 ноябрь куни кўчиб келдик. 3 хонали уйда 6 киши яшаймиз. Оқолтин туманининг ‘Аҳиллик’ маҳалласидаги барча қўни-қўшниларга ҳам замонавий хонадонлар топширилди. Ҳаммамиз шу маҳаллада яна биргамиз. 70 ёшга кириб, ҳали бундай шароитларни кўрмагандим. Далада мол-қўйнинг орқасидан юрган эдик. Хоналар иссиқ, совуқ ва иссиқ сув бор, йўлларимиз асфальт. Шундай уй ололмай, ўлиб кетсам керак, деб ўйлардим. Худога шукр, минглаб одамлар қатори бизга ҳам насиб қилди. Паспортларимиз ва кадастр ҳужжатларигача янгилаб беришди. Давлатимиз раҳбарига катта раҳмат», — деди Йўлдошали ота Қўчқоров.
Замонавий шаҳарча қиёфасини касб этган «Нурли келажак» маҳалласида кунора тўй маросими ўтказилмоқда: кимдир ўғлини уйлаган, яна кимдир қизини турмушга узатган. Азиза Исматова ҳам уч хонали янги хонадонига келин туширди.
«Келин олиш ниятида уйимизни таъмирдан чиқарган эдик. Аммо 1 май куни сув босиб, катта зарар кўрдик. Ушбу воқеадан кейин қаттиқ тушкунликка тушиб қолгандик. Шукрки, бизга барча шароитларга эга уч хонали уй, 40 миллион сўм пул ва турли маиший техникалар беришди. Бундан ташқари, эски уйимиз ҳам ўзимизга қолди. Ўғлимнинг тўйини янги уйимизда ўтказдик. Илоҳим ёшлар бахтли бўлишсин», — деди Азиза Исматова.
Мавзуга доир:
Изоҳ (0)