Bosh vazir Abdulla Aripov Mirzaobod, Oqoltin va Sardoba tumanlarida yangi qurilgan ko‘p qavatli uylardan foydalanish, ularni doim soz holatda saqlash hamda aholi uchun yangi ish o‘rinlarini yaratish borasida amalga oshirilayotgan ishlar bilan tanishish maqsadida Sirdaryo viloyatiga tashrif buyurdi, deb xabar beradi O‘zA.
Eslatib o‘tamiz, Prezident Shavkat Mirziyoyev 13-oktabr kuni Sirdaryo viloyatiga tashrifi chog‘ida mazkur hududlarda barpo etilgan ko‘p qavatli uylardan foydalanish, ularni doim soz holatda saqlash bo‘yicha aholi o‘rtasida targ‘ibot-tashviqot ishlarini tizimli tashkil etish vazifasi belgilab berilgan edi.
Sardoba tumanida ushbu topshiriq ijrosi yuzasidan tashkil etilgan yig‘ilishda yangi uylarni taqsimlash va aholining ushbu uylarga ko‘chib o‘tishini tashkil etish, mazkur hududlarda “Xavfsiz mahalla” tizimini joriy etish, hudud aholisi bandligini ta’minlash masalalari muhokama etilgan.
Ta’kidlanishicha, ishchi guruh tomonidan yangi uylarni taqsimlashda fuqarolarning hujjatlari o‘rganib chiqilgan. Shu asosida uylarga ko‘chib kirishdan oldin ular bilan suhbatlar o‘tkaziladi. Bunda, asosan, hududda noqonuniy qurilmalar qurmaslik, kommunal xizmatlar uchun to‘lovlarni o‘z vaqtida amalga oshirish, umumiy foydalaniladigan yo‘laklar, uylar atrofini ozoda saqlash borasida tushuntirish beriladi.
Yig‘ilishda mutaxassislar tomonidan Sardoba, Mirzaobod va Oqoltin tumanlaridagi talafot yetgan xonadonlarni yangi qurilgan ko‘p qavatli uylarga joylashtirish rejasi taqdimoti o‘tkazilgan.
Avvalroq Qozog‘istonda Sardoba fojiasi oqibatida boshpanasidan ajralganlarga yangi uylar topshirilgani to‘g‘risida xabar berilgandi.
Izoh (0)