O‘zbekistonda pandemiya sharoitiga qaramasdan, 2020-yilning 10 oyida avtoraqam.uzex.uz onlayn-auksioni orqali jami 218,8 milliard so‘m qiymatda 80,5 mingdan ziyod “chiroyli” raqamlar sotildi, deya xabar berdi UzEx tovar xomashyo birjasi matbuot xizmati.
Ushbu davrda 2,6 barobar ko‘proq avtoraqamlar sotilib, ulardan tushgan mablag‘ 71,2 foizga oshgan.
Qayd etilishicha, avtoraqamni sotib olish bo‘yicha bitta bitimning o‘rtacha qiymati 2,6 million so‘mni tashkil qilmoqda. Shu bilan birga, sotilgan davlat raqamining minimal qiymati 450,5 ming so‘mni, eng qimmat avtoraqamning qiymati esa 186,2 million so‘mni tashkil etdi.
Xabar berilishicha, yaqinda “Avtoraqam” mobil ilovasi yangi ko‘rinishda ishga tushirilib, unga savdo ishtirokchisini onlayn tarzda ro‘yxatdan o‘tkazish va avtoraqam bo‘yicha to‘lovlarni amalga oshirish funksiyalari qo‘shildi. Kiritilgan yangiliklar foydalanuvchilar uchun mobil ilova yordamida birjaning avtoraqam onlayn auksionlarida erkin ishtirok etish imkoniyatini to‘la taqdim etadi.
Ma'lumot uchun, 2019-yilda onlayn auksionlar orqali 156,1 milliard so‘mlik chiroyli raqamlar sotilgandi.
Izoh (0)