“Mas’ul rahbarlar bu kabi ‘hurmat ko‘rsatish’lardan voz kechishlari kerak”. Oliy Majlisning Bola huquqlari bo‘yicha vakili Andijonda o‘quvchilarning ustki kiyimsiz tashqariga chiqarilgani haqida

22-noyabr kuni ijtimoiy tarmoqlarda Andijon shahridagi 43-maktab o‘quvchilarining sovuqda ikki qator bo‘lib, yupun kiyimlarda bayroq ko‘tarib mahalliy amaldorlarni kutib olayotgani aks etgan surat tarqaldi. Andijon viloyati xalq ta’limi boshqarmasi tomonidan holat o‘rganilganidan so‘ng, maktab direktori va uning o‘rinbosari lavozimidan ozod etildi. O‘z navbatida Oliy Majlisning Bola huquqlari bo‘yicha vakili Aliya Yunusova mazkur holatga munosabat bildirib, maktab direktorining bu kabi xatti-harakatini umuman oqlab bo‘lmasligini ma’lum qildi.

“Sovuq havoda bolalarning yengil kiyimda ko‘chada turishiga yo‘l qo‘ygan maktab direktorining xatti-harakatini umuman oqlab bo‘lmaydi. Kim kelishidan qat’i nazar, bolalar mehmonni kutishga bu yo‘sinda majburlanmasligi kerak. Kim buning tashabbuskori bo‘lsa, javobgarlikka tortilishi shart. Ushbu voqea tegishli davlat idoralarida muhokama qilinmoqda, deb umid qilaman. Tez orada biz Xalq ta’limi vazirligining izohini eshitamiz. Bola huquqlari bo‘yicha vakil sifatida men xalq ta’limi vaziri Sherzod Shermatovning e’tiborini bolalarni jalb qilgan holda tadbirlarni o‘tkazishda bunday holatlarning takrorlanishiga yo‘l qo‘yilmasligiga qarataman”, — deya Aliya Yunusovaning so‘zlarini keltiradi O‘zA.

Shuningdek, Yunusova holat yuzasidan “Gazeta.uz”ga bergan izohida bolalar salomatligini xavf ostiga qo‘yish mumkin emasligi, keyinchalik ham shunaqa tadbirlarga bolalarni jalb qilishlariga mutlaqo qarshiligini bildirgan. “Mas’ul rahbarlar shunga o‘xshash ‘hurmat ko‘rsatish’ va bolalardan foydalanib boshqalarni qarshi olish tajribasidan voz kechishlari kerak. Bayramni bolalar bilan birga qilish kerak. Biz bolalarni to‘g‘ri narsalarga o‘rgatishimiz kerak”, — deydi Oliy Majlisning Bola huquqlari bo‘yicha vakili.

Ijtimoiy tarmoqlarda ko‘plab foydalanuvchilar Aliya Yunusovaning fikrlari qo‘llab-quvvatlagan. Xususan, Raimbergan Saburov ismli foydalanuvchi “O‘zi bunday dabdababozlik kimga kerak?”, deb yozgan bo‘lsa, Husniddin Turg‘unbayev “Ayrimlar faqat piar uchun ishlaydi. Qilayotgan ishining oqibatini o‘ylab ko‘rish nahotki qiyin bo‘lsa?”, deb fikr bildirgan.

Avvalroq Xalq ta’limi vazirligi matbuot xizmati vazir Sherzod Shermatov ilgari barcha maktab direktorlari va hududiy xalq ta’limi bo‘limlari rahbarlarini bunday holatlarga yo‘l qo‘ymaslik to‘g‘risida qat’iy ogohlantirganini ma’lum qilgandi.