22 ноябрь куни ижтимоий тармоқларда Андижон шаҳридаги 43-мактаб ўқувчиларининг совуқда икки қатор бўлиб, юпун кийимларда байроқ кўтариб маҳаллий амалдорларни кутиб олаётгани акс этган сурат тарқалди. Андижон вилояти халқ таълими бошқармаси томонидан ҳолат ўрганилганидан сўнг, мактаб директори ва унинг ўринбосари лавозимидан озод этилди. Ўз навбатида Олий Мажлиснинг Бола ҳуқуқлари бўйича вакили Алия Юнусова мазкур ҳолатга муносабат билдириб, мактаб директорининг бу каби хатти-ҳаракатини умуман оқлаб бўлмаслигини маълум қилди.
«Совуқ ҳавода болаларнинг енгил кийимда кўчада туришига йўл қўйган мактаб директорининг хатти-ҳаракатини умуман оқлаб бўлмайди. Ким келишидан қатъи назар, болалар меҳмонни кутишга бу йўсинда мажбурланмаслиги керак. Ким бунинг ташаббускори бўлса, жавобгарликка тортилиши шарт. Ушбу воқеа тегишли давлат идораларида муҳокама қилинмоқда, деб умид қиламан. Тез орада биз Халқ таълими вазирлигининг изоҳини эшитамиз. Бола ҳуқуқлари бўйича вакил сифатида мен халқ таълими вазири Шерзод Шерматовнинг эътиборини болаларни жалб қилган ҳолда тадбирларни ўтказишда бундай ҳолатларнинг такрорланишига йўл қўйилмаслигига қаратаман», — дея Алия Юнусованинг сўзларини келтиради ЎзА.
Шунингдек, Юнусова ҳолат юзасидан «Gazeta.uz»га берган изоҳида болалар саломатлигини хавф остига қўйиш мумкин эмаслиги, кейинчалик ҳам шунақа тадбирларга болаларни жалб қилишларига мутлақо қаршилигини билдирган. «Масъул раҳбарлар шунга ўхшаш ‘ҳурмат кўрсатиш’ ва болалардан фойдаланиб бошқаларни қарши олиш тажрибасидан воз кечишлари керак. Байрамни болалар билан бирга қилиш керак. Биз болаларни тўғри нарсаларга ўргатишимиз керак», — дейди Олий Мажлиснинг Бола ҳуқуқлари бўйича вакили.
Ижтимоий тармоқларда кўплаб фойдаланувчилар Алия Юнусованинг фикрлари қўллаб-қувватлаган. Хусусан, Раимберган Сабуров исмли фойдаланувчи «Ўзи бундай дабдабабозлик кимга керак?», деб ёзган бўлса, Ҳусниддин Турғунбаев «Айримлар фақат пиар учун ишлайди. Қилаётган ишининг оқибатини ўйлаб кўриш наҳотки қийин бўлса?», деб фикр билдирган.
Аввалроқ Халқ таълими вазирлиги матбуот хизмати вазир Шерзод Шерматов илгари барча мактаб директорлари ва ҳудудий халқ таълими бўлимлари раҳбарларини бундай ҳолатларга йўл қўймаслик тўғрисида қатъий огоҳлантирганини маълум қилганди.
Изоҳ (0)