Toshkent shahrining Bo‘zsuv aeratsiya stansiyaga Qoraqamish va Janubi-g‘arbiy kollektorlardan sutkasiga 630 ming kub metr oqova suv kelib tushmoqda. Shaharda 2020-yilning o‘tgan davri mobaynida oqova suvdan maxsus moslamalar orqali ushlab qolingan maishiy va sanoat chiqindilarining hajmi 292 tonnaga yetgan. Bu haqda “O‘zsuvta’minot” AJ axborot xizmati tomonidan ma’lum qilindi.
Kompaniya tomonidan xabar berilishicha, aholi tomonidan kanalizatsiyaga tashlab yuborilayotgan chiqindilar orasida oziq-ovqat qoldiqlari, yelim idishlar, kiyim-kechaklar, bolalar tagliklari va hokazolar bor. Shuningdek, ishlab chiqarish korxonalari tomonidan kanalizatsiyaga to‘qimachilik qoldiqlari, qushxona chiqindilari tashlanmoqda.
Bu ko‘rsatkich 2017-yilda 110 tonnani, 2018-yilda 182 tonnani, 2019-yilda 164 tonnani tashkil qilgan. Qayd etilishicha, kanalizatsiyaga tashlanayotgan maishiy va sanoat chiqindilarining hajmi yildan yilga oshib bormoqda.
Kompaniya tomonidan ta’kidlanishicha, kanalizatsiya tizimidagi buzilishlarning aksariyati esa yuqoridagi keltirilgan holat kabi unitaz yoki kanalizatsiya qudug‘iga maishiy va sanoat chiqindilari tashlanishi oqibatida sodir bo‘ladi.
“Bugungi kunda “O‘zsuvta’minot” AJ tomonidan ayni yo‘nalishda targ‘ibot ishlari boshlab yuborilgan. Xususan, kanalizatsiyadan to‘g‘ri foydalanish bo‘yicha qo‘llanmalar tayyorlanib, iste’molchilarga tarqatilmoqda”, — deyiladi kompaniya xabarida.
Izoh (0)