“Muvaffaqiyatli insonlarning uchta siri bor: o‘ziga bo‘lgan ishonch, ijobiy fikr, halol va mashaqqatli mehnat. Ko‘pchilik ushbu uchta prinsipni biladi, ammo ulardan juda kamchiligi bularni amalda qo‘llaydi”, – deydi Konor Makgregor o‘z muvaffaqiyati haqida.

Darhaqiqat, Konorning bu gaplarni baralla aytishiga to‘laqonli ravishda haqi bor: oddiy irland oilasidan chiqqan yigit nafaqat ishsizlik nafaqasini oluvchi insondan aralash jang san’atlarining eng mashhur vakiliga aylandi, balki ushbu sport turini yanada ommalashishiga o‘zining ulkan hissasini qo‘shdi. Hozirda UFC shunchaki ochko, zarba va soniyalar emas. U allaqachon tomoshabinlarning ovunchog‘iga aylanib ulgurgan.

O‘zini tutishi, UFC bilan mohirona muomalasi va hech bo‘lmaganda zaboni bilan Makgregor tom ma’noda tarix yarata oldi. Eddi Alvares, Habib Nurmagomedov va Neyt Dias bilan oktagondagi janglari, shuningdek, Floyd Meyvezer bilan ringdagi to‘qnashuvi irlandiyalik sportchining hayotini tubdan o‘zgartirib yubordi.

To‘g‘ri, Konor hozir avvalgi vajohatini yo‘qotgan va anchadan buyon janglar o‘tkazmayotgan bo‘lsa-da, u yana bir necha o‘n yillar davomida o‘zi va atrofidagilari bilan birga yaxshi hayot kechirish imkoniga ega.

“Yengil, yarim yengil yoki yarim og‘ir vazn toifalari meni qiziqtirmaydi, men qayg‘uradigan yagona vazn, bu cheklarimning og‘irligi. Ular esa o‘ta og‘ir vaznli”, – deydi Konor pullari haqida.

Konorning oilasi va yaqinlari haqida

Makgregorning asosiy boyligi, shubhasiz, bu uning oilasi va rafiqasidir.

Irlandiyalik o‘z sevgisini tungi klublarning birida uchratgan. O‘shanda Konor 20, Di Devlin (Konorning rafiqasining ismi shunday) esa 18 yoshda edi. Shundan so‘ng juftlik Dublin yaqinida ijarada og‘ir yillarni boshdan o‘tkazgan, o‘sha yillari Makgregor santexnik bo‘lib ishlar va oyiga 186 yevro topardi. Devlin esa bu vaqt davomida Konorning yonida bo‘ldi va yigitchani imkoni yetganicha qo‘llab-quvvatladi.

“U faoliyatimning boshidan beri men bilan birga bo‘lgan, o‘sha paytda menda umuman hech narsa yo‘q edi. U meni mashg‘ulotlarga olib borar, orzularimni tinglar va butun faoliyatimga yordam berardi. Agar u bo‘lmaganida, men hozir turgan joyimga chiqa olmas edim. Uni ishga olish, u bilan dunyo bo‘ylab sayohat qilish va u istagan narsalarni bera olish imkoniyatiga ega ekanligim meni g‘ururlantiradi”, – deydi Makgregor rafiqasi haqida.

Hozirda baxtli juftlik ikki nafar farzandni voyaga yetkazmoqda.

Shuningdek, Konor og‘ir yillarda yordam bergan oilasiga ham samimiy minnatdorchilik bildiradi.

Vaqt o‘tishi bilan ularning safiga Konorga ustozlik qilgan Jon Kavana ham qo‘shiladi. U ham barcha qiyinchiliklarda Konor bilan yelkama-yelka turgan.

“Har bir inson o‘z atrofidagi muhitning mahsulidir, shu bois o‘zimni maqsadlarga aniq yo‘naltirish uchun savodli odamlar bilan birga bo‘lishga harakat qilaman”, – deydi Makgregor atrofidagilarga hurmat bajo keltirar ekan.

Konorning kiyinish uslubi haqida

“Men yoqtiradigan ikkita narsa bor: raqiblarimning aftini bejash va yaxshi ko‘rinishga ega bo‘lish”. Haqiqatan ham, aynan kiyinish uslubi, soch turmagi va soqol ham Konorga qo‘shimcha mashhurlik bag‘ishlaydi.

Kiyimlarni esa u jahonning eng qimmat brendlari bo‘lmish Versace, Louis Vuitton, Givenchy, Gucci singari butiklardan xarid qiladi.

Konorning soatlari haqida

Qo‘liga oddiy elektron soat taqqan kunlarini tabassum bilan eslaydigan Konorning eng zaif tomonlaridan biri soatlardir. Hozirga kunda MMA yulduzining tortmasida Rolex (Cosmograph Daytona), Oyster Perpetual Yacht-Master II, Perpetual Sky-Dweller, Oyster Perpetual, Hublot (MP-05 LaFerrari Sapphire, Franck Muller, Patek Philippe (Nautilus), Audemars Piguet, Royal Oak Offshore kabi dunyoga mashhur brendlarni ko‘rish mumkin. Ularning umumiy qiymati esa naq 800 ming dollarga baholanadi.

Ijtimoiy tarmoqlar va reklama

Konor Internet tarmog‘ida o‘ta faol bo‘lib. Uni Twitter’da 8,3 million, Instagram’da esa 37,3 million inson kuzatib boradi.

Bundan tashqari, uning suratlari muntazam ravishda sport va moda jurnallari muqovalaridan o‘rin olib keladi.

Shuningdek, Makgregor reklama shartnomalaridan ham millionlab dollar topishini alohida ta’kidlash joiz.

Konorning mashinalari haqida

Avtomobillar borasida ham Konor o‘ziga eng yaxshilarini ravo ko‘radi. Xususan, uning garajidan BMW i8 (155 ming dollar), Mercedes-Benz A200 Sedan (36 ming dollardan boshlanadi), Mercedes-Benz S550 Coupe (120 ming dollar), McLaren 650S (280 ming dollar), Cadillac Escalade (93 ming dollar), Range Rover (160 ming dollar), Rolls-Royce Ghost (400 ming dollar), Rolls-Royce Phantom Drophead Coupe (880 ming dollar) Lamborghini Aventador’ni (345 ming dollar) ko‘rish mumkin.

Bundan tashqari, Konor 4 million dollar va 3 million dollarlik ikkita yaxtaga ham egalik qiladi.

Konorning uylari haqida

Ishi yuzasidan Makgregor ikki qit’ada yashashga majbur. Qo‘shma Shtatlarda Konorning bahosi 2,5 millionga dollarga teng bo‘lgan hashamatli villasi bor.

Shuningdek, uning ixtiyorida Ispaniyadagi ham villa mavjud bo‘lib, u shundoqqina sohil bo‘yida joylashgan. Uning narxi 2,2 million dollarni tashkil qiladi.

Va, albatta, vatani Irlandiyada ham uyi bo‘lib, uning narxi biroz kamtarroq – 2 mln yevro, ammo bu devorlarning qiymati pulda emas, balki ularning joylashgan hududidadir:

“Amerika yoki Irlandiya? Do‘stim, agar bu savolni yana bir marta eshitsam, yuzingni bejab qo‘yaman. AQSh hech qachon mening uyim bo‘lmaydi. Mening uyim Irlandiya. Vatanim bilan faxrlanaman va hech narsaga qaramay, bizda hamma narsa yaxshiligiga ishonaman. Amerikaga kelishimning yagona sababi UFC. Irlandiya – yer yuzidagi eng yaxshi joy. Men baxtli va mag‘rur irlandman”, – deydi Konor vatani haqida.

E’tiborga molik tomoni, Konor ishlagan pullarini faqat sarflash bilan shug‘ullanmaydi, balki ularni boshqa tadbirkorlik sohalariga ham yo‘naltiradi. Bugunga kunda u bir qator dasturlar va ilovalar bilan birga spirtli ichimliklar mahsulotlarini ishlab chiqaradigan shaxsiy kompaniyasiga ham asos solgan.