Bundan buyog‘iga davlat idoralari rahbar xodimlari uchun qanday avtomobil sotib olinishi mumkinligi aniq belgilab qo‘yilishi kutilmoqda. Bu haqda 18-noyabr kuni Oliy Majlis Qonunchilik palatasining navbatdagi majlisida Moliya vaziri Timur Ishmetov so‘z yuritdi.
“Daryo” muxbirining xabar berishicha, majlisda davlat budjeti va davlat maqsadli jamg‘armalarining 9 oydagi ijrosi tanqidiy-tahliliy ruhda ko‘rib chiqildi.
Tadbirda deputat Rasul Kusherbayev Moliya vaziriga quyidagi savol bilan yuzlandi:
“Mahalliy budjetlarda orttirilgan mablag‘ning kamida 10 foizi jamoatchilik fikrini hisobga olgan holda turli sohalarga yo‘naltirilishi kerak edi. Lekin biz oxirgi vaqtlarda ko‘ryapmizki, negadir orttirilgan mablag‘ hisobidan hokimlarimiz, boshqa tashkilotlarimiz qimmat-qimmat avtomobillar olishga zo‘r berib ketishdi. Bu yerda jamoatchilik fikri qanchalik hisobga olinyapti? Yoki jamoatchilik hokimlarimiz qimmat mashina olsin degan taklifni beryaptimi? Bu negadir bir-birining mantig‘iga to‘g‘ri kelmayapti. Shu masala bo‘yicha Moliya vazirimizning nuqtayi nazarini bilmoqchi edim”.
Bunga javoban Timur Ishmetov o‘z munosabatini bildirdi.
“Mahalliy budjetlar orttirilgan qismining 10 foizini fuqarolar fikrini eshitgan holda ishlatish tartibi belgilangan. Buning uchun Moliya vazirligi ochiq budjet portalini ham ishga tushirgan. Ish boshlangan, bizning fikrimizcha, afsuski, biz kutgan darajada ijobiy natija bergani yo‘q. Hali bu bo‘yicha ko‘p o‘zgarishlarni qilishimiz kerak.
Bu yil bo‘yicha aytadigan bo‘lsak, yaqinda ikkinchi chorak yakunini tahlil qildik, uchinchi chorakni endi tahlil qilmoqchi edik. Ikkinchi chorakni tahlil qilganda orttirib bajarilgan mahalliy budjetlarga qolgan qismining 10 foizini, o‘zida qolgani 200 mlrd so‘mdan ortiqni tashkil qilgan bo‘lsa, 20 mlrd so‘mini fuqarolar bilan fikrlashib, ularning fikrini olib, ishlatish kerak bo‘lgan. Aslida buning yarmi, 10 mlrd so‘m shu yo‘nalishda ishlatilgan.
Bu yil bunday kam bo‘lishiga sabab – bahorda kelgan pandemiya natijasida hokimliklar mablag‘larning bir qismini pandemiyaga qarshi kurashish tadbirlariga ishlatgan: dori-darmon olib bergan, oziq-ovqat, boshqa yo‘nalishlar, shu bilan izohlasa bo‘ladi”, — dedi Moliya vaziri.
Ishmetovning ta’kidlashicha, jamoatchilik faolligi hukumat, kerak bo‘lsa, parlamentga tegishli qaror qabul qilishga turtki bo‘ladi. Ayni paytda ishlab chiqilayotgan davlat amaldorlari qanday avtomobil sotib olishi aniq ko‘rsatib qo‘yiladigan loyiha ham hukumat topshirig‘i asosida tayyorlanmoqda.
“Bunday iqtisodiy inqiroz, pandemiya paytida mahalliy hokimliklar, barcha davlat idoralari xarajatlarini nafaqat qonuniy nuqtayi nazardan, balki mantiq, fuqarolarning hayot tarzidan kelib chiqqan holda ham amalga oshirsa, to‘g‘ri bo‘lardi, deb hisoblayman. Bunga juda ham tanqid bilan qaraymiz.
Jamoatchilik faolligi hukumat, kerak bo‘lsa, parlamentga tegishli qaror qabul qilishga turtki bo‘ladi. Aynan mana shu avtomobillar misoliga keladigan bo‘lsak, biz hukumatdan topshiriq oldik. Bundan buyog‘iga davlat idoralari rahbar xodimlari qanday avtomobil sotib olishi aniq ko‘rsatib qo‘yiladi. Hozir Moliya vazirligi tomonidan bu loyiha ishlab chiqilmoqda. Nasib qilsa, haftaning oxirigacha ishlab chiqish niyatimiz bor, hukumatga kiritamiz. Bu yerda har bir lavozimni qo‘yib, qaysi lavozimga qanday mashina sotib olish mumkinligini aniq ko‘rsatib qo‘yamiz.
Agar turli vazirlik, hokimliklar jamoatchilikda shunday fikr paydo bo‘lishiga olib kelayotgan bo‘lsa, aniq ko‘rsatib qo‘yishga majbur bo‘lamiz. O‘ylaymanki, davlat mablag‘larining samarali ishlatilishining yakka-yu yagona yo‘li – biz tomondan ochiqlikni ta’minlab borish, jamoatchilik va parlamentdan ularning fikrlarini eshitib, keyin reaksiya qilish”, — dedi Timur Ishmetov.
Izoh (0)