“Qashqadaryoda vahshiylarcha o‘ldirilib, yoqib yuborilgan chol-kampir voqeasi bo‘yicha 300 dan ortiq shaxs so‘roq qilingan” — Bosh prokuratura
Qashqadaryo viloyatining Mirishkor tumanida vahshiylarcha o‘ldirilib, so‘ngra yoqib yuborilgan 66 yoshli chol va uning 62 yoshli kampiri voqeasiga oydinlik kiritish maqsadida 300 dan ortiq fuqaro so‘roq qilingan. Bu haqda “Daryo”ga Bosh prokuratura ma’lum qildi.
Ta’kidlanishicha, viloyat prokuraturasi o‘ta og‘ir jinoyatlarni tergov qilish bo‘limi tomonidan Mirishkor tumani Chandir qishlog‘ida yashovchi X.A., uning turmush o‘rtog‘i ayol O.O‘.ning qasddan o‘ldirib ketilganligi va shu xonadonda yashovchi kelini J.Sh. hamda uning voyaga yetmagan o‘g‘lini qasddan o‘ldirishga suiqasd qilinganligi yuzasidan Jinoyat kodeksining 97-moddasi 2-qismi “a” bandi (ikki yoki undan ortiq shaxsni qasddan o‘ldirish) va 25, 97-moddasi 2-qismi “v” bandi (jinoyatga tayyorgarlik ko‘rish va aybdorga ayon bo‘lgan ojiz ahvoldagi shaxsga suiqasd qilish) bilan jinoyat ishi qo‘zg‘atilgan va dastlabki tergov harakatlari olib borilmoqda.
“Mavhum holatlarda sodir etilgan ushbu o‘ta og‘ir turdagi qotillik jinoyatini ‘issiq iz’larda fosh qilish yuzasidan viloyat IIB jinoyat-qidiruv va boshqa xizmat sohalari jalb qilinib, tergov harakatlarini muvofiqlashtirilgan holda olib borish yuzasidan qo‘shma reja tuzilgan holda bir qator tergov taxminlari ilgari surilmoqda”, — deyiladi Bosh prokuratura bergan ma’lumotda.
Aytilishicha, tergov harakatlari davomida 24 ta tintuv tergov harakatlari o‘tkazilib, 300 dan ortiq shaxs so‘roq qilingan. Yuzlashtirish, tanib olish, ko‘rsatuvlarni hodisa sodir bo‘lgan joyda tekshirish tergov harakatlari o‘tkazilgan. Shuningdek hodisa joyidan va tergov harakatlari davomida olingan daliliy ashyolarga nisbatan sudga oid tibbiyot, kriminalistika, biologiya, DNK, daktilaskopiya, trassologik, sud kimyo, yong‘in texnikaviy ekspertizalari tayinlangan.
Bosh prokuratura sodir etilgan qotillik jinoyatini fosh qilish va ish bo‘yicha haqiqatni aniqlashga to‘sqinlik qilish holatlarining oldini olish maqsadida boshqa tafsilotlar oshkor qilinmasligini ma’lum qilgan.
Qo‘shimcha qilinishicha, natijalar haqida keng jamoatchilikka qo‘shimcha axborot beriladi.
Eslatib o‘tamiz, Mirishkor tumanining Chandir qishlog‘ida yashovchi 66 yoshli chol va uning 62 yoshli kampiri o‘ldirilib, yoqib yuborilgach, uning kelini va o‘g‘li “Daryo” muxbiriga voqea tafsilotlarini gapirib bergandi. Ularning aytishicha, 2020-yil 4-oktabr kuni sodir etilgan jinoyat gumonlanuvchilari IIB tomonidan qo‘lga olingach, ishni o‘rgana boshlagan prokuratura ularni qo‘yib yuborgan.
