“Liverpul” yarim himoyachisi Jordan Henderson Angliya terma jamoasining Belgiyaga qarshi kechgan o‘yinida (0:2) jarohat oldi, deya xabar qilmoqda Liverpool Echo.
Angliya terma jamoasi bosh murabbiyi Garet Sautgeytning ma’lum qilishicha, futbolchi tanaffus vaqtida o‘zini yomon his qilgan. Ayrim xabarlarga ko‘ra, Henderson son mushaklarini shikastlab olgan bo‘lishi mumkin.
Shu tariqa so‘nggi bir haftaning o‘zida “Liverpul”ning besh nafar futbolchisi safdan chiqdi. Hendersondan tashqari Jo Gomes va Endryu Robertson terma jamoasi safida jarohat olgan, Trent Aleksander-Arnold esa FIFA kunlaridan oldin safdan chiqqandi. Muhammad Salohda koronavirus aniqlangan.
Shuningdek, “Liverpul” lazaretida ayni damda Fabinyo, Virjil van Deyk, Tiago Alkantara va Aleks Oksleyd-Chemberlen kabi futbolchilar jarohatini tiklash bilan band.
Yurgen Klopp qo‘l ostidagi jamoa navbatdagi o‘yinini 22-noyabr kuni Premyer Liga peshqadami “Lester”ga qarshi o‘tkazadi. Mazkur bahsda jamoa katta ehtimol bilan asosiy to‘rt himoyachisidan foydalana olmaydi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)