O‘zbekiston Milliy olimpiya qo‘mitasining (MOQ) majlislar zalida 16-noyabr, dushanba juni MOQning navbatdan tashqari yig‘ilishi bo‘lib o‘tdi.
Majlisda o‘zbekistonlik sportchilarni Tokio—2020 va Parij—2024 Olimpiya o‘yinlariga tayyorgarlik ko‘rishi va ishtirok etishi jarayonlari, O‘zbekiston MOQga yangi rais o‘rinbosari vazifasini bajaruvchisini saylash, Qo‘mita ustaviga o‘zgartirish kiritish va yangi tahririni tasdiqlash, boshqa sport turlarini tan olish bo‘yicha federatsiya va assotsiatsiyalar murojaatlarini ko‘rib chiqish kabi masalalar o‘rin oldi.
MOQ rahbari Rustam Shoabdurahmonov sport faoliyatini tashkil etish va rivojlantirish maqsadida joriy etilgan yangi rais o‘rinbosari vazifasiga Sherzod Toshmatov nomzodini ilgari surdi. Delegatlar rais o‘rinbosari vazifasini bajaruvchi lavozimiga ko‘rsatilgan nomzod — O‘zbekiston taekvondo WT assotsiatsiyasi raisi Sherzod Toshmatovni bir ovozdan ma’qulladi.
Toshmatov 2009-2010-yillarda O‘zbekiston havaskor va professional muaytay assotsiatsiyasi raisi o‘rinbosari, 2010—2014-yillarda ushbu assotsiatsiya raisi, 2013-2014-yillarda Sharq yakkakurashlari va jang san’atlarini rivojlantirish markazi raisi o‘rinbosari, 2014—2019-yillarda O‘zbekiston boks federatsiyasi raisining birinchi o‘rinbosari, 2016—2019-yillarda AIBA ijroiya qo‘mitasi a’zosi, Osiyo boks konfederatsiyasi vitse-prezidenti lavozimlarida ishlagan. 2019-yildan hozirgi vaqtga qadar esa O‘zbekiston taekvondo WT assotsiatsiyasi raisi hisoblanadi. Pandemiya sharoitida Sherzod Toshmatov MOQning tezkor shtabi rahbari sifatida faoliyat yuritgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)