Фарғона давлат университетида талабаларнинг фарзандлари учун «Болажон» инновация маркази ташкил этилган. Бу ҳақда Ўзбекистон Гендер тенгликни таъминлаш масалалари бўйича комиссияси томонидан 12 ноябрь куни ўтказилган матбуот анжуманида маълум қилинди, дея хабар бермоқда «Дарё» мухбири Мусулмонбек Иброҳимов.
Сенат раиси Танзила Норбоеванинг таъкидлашича, талабалик вақтида турмушга чиққан қизлар фарзандли бўлгач, аксарият ҳолларда ўқишни давом эттиролмайди. Шу боис Гендер тенгликни таъминлаш масалалари бўйича комиссияси янги ташаббус билан чиққан — Фарғона давлат университетида фарзандли талабалар учун «Болажон» инновация маркази ташкил этилган.
«Бу марказга талабалар боласини олиб келиб, дарсдан сўнг олиб кетиши мумкин. Шунингдек, талабаларнинг турмуш ўртоғи болани марказга олиб келиб, фарзандини овқатлантириб, қайтариб олиб кетиши мумкин. Ўйлайманки, ушбу ташаббус бошқа олий таълим муассасаларида ҳам жорий этилади», — деди Танзила Норбоева.
Фарғона давлат университети табиий фанлар декани Шуҳрат Мамажоновнинг «Дарё»га маълум қилишича, «Болажон» инновация марказига университет бюджетдан ташқари маблағлари ҳисобидан 296 миллион сўм сарфланган. Марказ 50 ўринга мўлжалланган бўлиб, кичик (2-3 ёшли болалар) ва катта (4-5 ёшли болалар) ёшли болалар гуруҳларига бўлинган.
Изоҳ (0)