Prezident Shavkat Mirziyoyev Qashqadaryo viloyati faollari, mahalliy kengash deputatlari, vazirlik va idoralar rahbarlari ishtirokidagi yig‘ilishda hududda ta’lim sifati qoniqarsiz ekanligini aytib, 2020-yil 191 ta maktabning birorta ham bitiruvchisi oliy o‘quv yurtlariga kira olmaganini ta’kidladi. Bu haqda “Daryo” manbasi xabar berdi.
“Mahalliy kengash deputatlari mana shu 191 ta maktab direktorining oldiga borib, nimaga bunday natija bo‘ldi, 11 yil davomida qilgan ishlaringiz shumi, deb savol berdimi?”, — dedi davlat rahbari bu haqda fikr bildirar ekan.
Shavkat Mirziyoyev viloyatdagi maktab bitiruvchilarining OTMga kirishi respublikada eng past ko‘rsatkich ekanligini aytgan.
“Viloyat o‘quvchilarining Oliy ta’lim muassasalariga kirishi respublika bo‘yicha 13-o‘rinni qayd etgan. Vaholanki, o‘zi 14 ta hududimiz bor”, — degan Prezident.
Davlat rahbarining ta’kidlashicha, viloyatning 88 ta maktabida me’yoridan ortiq o‘quvchi o‘qiydi. 73 ta maktab filiallari binosi paxsadan qurilgan. Shu sabab ham viloyatda paxsadan qilingan maktablar binosini qayta qurish va ta’mirlash uchun maktablarga 250 milliard so‘m, jihozlash uchun esa 20 milliard so‘m ajratilishi ma’lum qilindi.
Eslatib o‘tamiz, avvalroq viloyatning Chiroqchi tumanidagi 61-maktabning qo‘rqinchli sinfxonalari ijtimoiy tarmoqlarda ko‘plab muhokamalarga sabab bo‘lgandi. Voqealar ortidan tushgan OAV vakillari mazkur sinfxonalarda ikki yil davomida o‘quvchilarga ta’lim berilganini fosh qildi. Voqealar xabar topgan viloyat hokimi Zoir Mirzayev esa, sinfxonalarga o‘tin kiritib, jamoatchilikni aldagan maktab direktorini vazifasiga noloyiq deb atadi.
Izoh (0)