Toshkentda tunda oziq-ovqat do‘konidan 1 mln so‘m pul va 3 mln so‘mlik mahsulot o‘g‘irlagan namanganlik erkak qo‘lga olindi

Toshkent shahar Olmazor tumanida joylashgan oziq-ovqat do‘konidan tunda bir million so‘m pul va uch million so‘mlik mahsulot o‘g‘irlagan namanganlik 42 yoshli erkakka nisbatan jinoyat ishi ochildi. Bu haqda Toshkent shahar IIBB xabar berdi.

Ma’lum qilinishicha, 9-avgust soat 22:50 dan 10-avgust soat 07:50 gacha bo‘lgan vaqt ichida noma’lum shaxs 36 yoshli Azizjon K.ga tegishli bo‘lgan oziq-ovqat do‘konining eshigini ochib, u yerdan uch million so‘mlik mahsulot va kassadan bir million so‘m o‘g‘irlab ketgan.

Ko‘rilgan choralar natijasida o‘g‘rilikda gumonlanuvchi shaxs Namangan viloyatidan bo‘lgan 42 yoshli G‘ulomjon K. qo‘lga olindi. Unga nisbatan O‘zbekiston Respublikasi Jinoyat kodeksining 169-moddasi 2-qismi (o‘g‘rilik) bo‘yicha jinoiy ish qo‘zg‘atildi.