Bugun,

  • USD 11095.31
  • RUB 173.84
  • EUR 10772.44

Qashqadaryo viloyatining Muborak tumanida haydovchini armatura bilan urib, pichoq bilan qo‘rqitgan va unga tegishli avtomobilni tortib olgan er-xotinga sud hukmi o‘qildi. Bu haqda “Daryo”ga Jinoyat ishlari bo‘yicha Muborak tuman sudi raisi Alisher Qahhorov ma’lum qildi.

Aniqlanishicha, 2019-yil mart oyida 20 yoshli Asqar (barcha ismlar o‘zgartirilgan) ota-onasining xohishiga qarshi Mirishkor tumanining Jeynov qishlog‘ida yashovchi 24 yoshli Adolatni olib qochgan va unga uylangan. Dastlab er-xotin Adolatning uyida yashab kelgan. Ishsizlik sabab oilada muammolar yuzaga kelavergach 2019-yil 1-oktabr kuni ular Muborak tumanidagi oziq-ovqat dehqon bozoriga borib, ish izlashga tushgan.

Ish topilmagach mo‘may daromad topish maqsadida taksichilarni tunashni maqsad qilgan er-xotin bozor hududidan armatura bo‘lagi, oshxona pichog‘ini olib, kiyimiga yashirgan.

So‘ngra bozorcha hududida kira qilib yurgan “VAZ-2105” rusumli “Jiguli” haydovchisi Boburga Muborak tumanining O‘tror qishlog‘iga olib borib qo‘yishini, evaziga 90 ming so‘m yo‘l haqi berishini aytib, yo‘lga chiqqan.

Mashina cho‘l hududidan o‘tayotganda oldindan tuzilgan rejaga ko‘ra, Adolat tobi qochayotganini bahona qilib, haydovchiga mashinani to‘xtashini aytgan. Adolat mashinadan tushgach Asqar ham uning ortidan tushgan. Ular cho‘ldagi jing‘il panasiga o‘tgan. Shunda Adolat qorni og‘riyotganini aytib, baqira boshlagan. Asqar esa haydovchi Boburni yordamga chaqirgan.

Haydovchi va Asqar Adolatni ko‘tarib, mashinaga chiqarmoqchi bo‘lishganida Asqar Adolatni ko‘tarib ketayotgan haydovchining boshiga armatura bilan uradi va yerga yiqitadi. Qochishga uringan Boburga pichoq o‘qtalib, yonidagi puli va mashinasini berishini talab qilgan. Aytganini bajarmasa, pichoq bilan o‘ldirishini aytgan.

Haydovchi pichoq o‘qtalgan er-xotinga yonidagi pullari va mashinasi kalitini berishini, faqat uni o‘ldirmasliklarini so‘raydi. Er-xotin mashina kaliti va haydovchining pullarini olib, haydovchini cho‘lda qoldirgan. Talonchi er-xotindan qutilgan Bobur bir necha soat yo‘l yurib, qishloqqa kirgan va akasiga qo‘ng‘iroq qilib, yordam so‘ragan.

Mashina va haydovchining pullarini qo‘lga kiritgan er-xotin esa Buxoro viloyati tomon yo‘l olgan. Biroq, yo‘lda mashina loyga botib qolgani bois er-xotin o‘sha kuni kechasi mashinada qolishga majbur bo‘lgan. Ertalab uyg‘onganda esa, IIB xodimlari tomonidan qo‘lga olingan.

20 yoshli er va 24 yoshli xotin qilmishini ko‘rib chiqqan Jinoyat ishlari bo‘yicha Muborak tuman sudi erning qilmishi uchun unga 12 yil, xotiniga esa 7 yil ozodlikdan mahrum qilish jazosini tayinlagan.

Izoh
Asosiy yangiliklar
Mahalliy
Oʻzbekiston energetikasi: ortayotgan talab, taqchillik va koʻrilayotgan choralar haqida
Dunyo
Qirg‘izistonda 9 kishida “Seftriakson”ga allergik reaksiya kuzatildi, bir kishi vafot etdi
Mahalliy
Besh yilda 218 mingdan koʻproq xonadon. Oʻzbekistonda uy-joy muammosi qanday hal etilmoqda?