O‘zbekistondagi Duty Free do‘konlarini boshqaruvchi “Central asia megastar” MChJ kompaniyasi xususiylashtiriladigan kompaniyalar ro‘yxatiga tushdi. Bu haqda Davlat aktivlarini boshqarish agentligi ma’lumotlariga tayanib, Spot xabar berdi.
Hozirgi paytda kompaniyaning 52,3 foizli nazorat paketi davlatga tegishli bo‘lib, uni xususiy sektorga sotish rejalashtirilmoqda. Agentlik ma’lumotlaridan ma’lum bo‘lishicha, 1995-yilda tuzilgan “Central asia megastar” MChJ ro‘yxatdagi barqaror sof foyda keltiradigan kam sonli kompaniyalardan biri hisoblanadi.
Duty Free 2018-yilda 74,2 milliard so‘m daromad, shundan 31,3 milliard so‘m sof foyda olgan. 2019-yilda esa bu ko‘rsatkich mos ravishda 87,4 milliard va 23,7 milliard so‘mni tashkil qilgan.
Kompaniya aeroportlar faqat charter va maxsus reyslarni qabul qilgan karantin vaqtida ham o‘z rentabelligini saqlab qoldi. 2020-yilning uchinchi choragida kompaniyaning daromadi 23,7 milliard so‘mni, sof foydasi esa 6,7 milliard so‘mni tashkil qilgan.
Kompaniya aktivlarining rentabelligi ham ijobiy ko‘rsatkichlarni saqlagan — 0,23 foiz. O‘tgan ikki yilda esa rentabellik 0,61 foiz va 0,56 foizga teng bo‘lgan. Kompaniya kapitalining rentabelligi 2020-yilda 7,9 foizni tashkil etgan bo‘lsa, bu ko‘rsatkich 2018-yilda 37,2 foiz, 2019-yilda esa 28,2 foizga teng bo‘lgan.
2020-yilda kompaniyaning qarzlari keskin — 7,1 milliard so‘mdan 16,8 milliard so‘mga ortgan. Boshqa kompaniyalarning Duty Free oldidagi qarzlarida ham shunday holat kuzatilgan. Qarzlar miqdori 491,9 million so‘mdan 4,4 milliard so‘mga oshgan.
Toshkent xalqaro aeroportidagi birinchi Duty Free do‘koni 1991-yilda ochilgan. 1995-yilda “Central asia megastar” MChJ tuzilgan. Kompaniya saytida aytilishicha, Duty Free Toshkent, Samarqand, Buxoro va Urganch aeroportlarida ishlaydi.
Izoh (0)