Daniya qishloq xo’jaligi vaziri Mogens Yensen noyabr oyining boshida e’lon qilingan va mamlakatdagi barcha qorako‘zanlarni o‘ldirish haqidagi buyruq xato ekanligini tan oldi. Bu haqda “Vedomosti” xabar berdi.
Televideniye orqali chiqish qilgan vazir qorako‘zan yetishtirish bilan shug‘ullanadigan fermerlardan uzr so‘ragan va bu xato uchun javobgarlikni o‘z zimmasiga olgan. Mamlakatdagi bacha qorako‘zanlarni yo‘q qilish to‘xtatilgan.
Daniya hukumati noyabr oyining boshida mamlakatdagi barcha qorako‘zanlar (ularning soni 15-17 milliontani tashkil etadi) mutatsiyaga uchragan koronavirus hayvonlardan odamlarga o‘tish xavfi sababli yo‘q qilinishini e’lon qilgan. Biroq ma’lum bo‘lishicha, hayvonlarni shoshilinch yo‘q qilish haqida qaror qabul qilingan vaqtda hukumatda ularni yo‘q qilishni barcha fermer xo‘jaliklaridan talab qilish vakolati bo‘lmagan. Bunday talab Daniya konstitutsiyasiga zid kelgan. Hayvonlarni yo‘q qilishni faqat kasallik qayd etilgan fermalardan va ulardan sakkiz kilometr radiusda joylashgan xo‘jaliklardan talab qilish qonuniy bo‘lgan bo‘lardi. Aks holda tegishli qonun yoki mamlakatda favqulodda holat rejimi joriy qilinishi kerak bo‘lardi.
Muxolifat partiyalari mamlakat rahbariyatiga mazkur qonun buzilishini ko‘rsatganda qishloq xo‘jaligi vaziri dastlab bunday talab qo‘yish huquqi bo‘lmaganini ma’lum qilgan, biroq hukumat vaziyatni shunchalik jiddiy deb hisoblagani sababli tegishli qonun qabul qilinishini kutish kerakmasligini tushuntirgan.
Bir kun o‘tgach vazir o‘z bayonotini o‘zgartirgan hamda u fermerlarga buyruq emas, balki tavsiya berganini ta’kidlagan. Muxolifat va fermerlar bu bayonotdan g‘azablanganda esa vazir Yensen xatoni tan olib chiqdi. “Biz xatoga yo‘l qo‘ydik. Men uzr so‘rayman. Men o‘z vazirligimda yuz berayotgan barchasi uchun javobgarlikni zimmamga olaman. Boshqacha bo‘lishi ham mumkin emas. Biroq bu koronavirus sharoitida Daniyada qorako‘zan yetishtirish jiddiy xatarga ega ekanligini rad etmaydi”, — deya ma’lum qilgan vazir.
Daniya bosh vaziri Mette Frederiksen deputatlarning savollariga javob berish chog‘ida vazir Yensen bu masala bo‘yicha parlament oldida hisobot berishini ma’lum qilgan.
Avvalroq Daniyada qorako‘zanlardagi koronavirus mutatsiyasi sabab odamlarning ko‘chaga chiqishiga cheklovlar belgilangani haqida xabar berilgandi.
Izoh (0)