Belarus atom elektr stansiyasi (BelAES) elektr energiyasini ishlab chiqarishni vaqtincha to‘xtatdi. Bu haqda BelAESga tayanib, “Interfaks” xabar berdi.
Qayd etilishicha, AES qachon faoliyatini qayta tiklashi aniq emas. BelAES energiya ishlab chiqarishni to‘xtatganligi haqidagi ma’lumot 8-noyabr kuni paydo bo‘ldi.
Norasmiy ma’lumotlarga ko‘ra, bunga generator bilan bog‘liq bo‘lgan bloklardan birida kuchlanish transformatorlarining ishlamay qolishi sabab bo‘lgan. Ushbu hodisa radiatsiya oqishi nuqtayi nazaridan hech qanday xavf tug‘dirmasligi ta’kidlandi.
Belarus prezidenti Aleksandr Lukashenko 7-noyabr kuni Ostrovets shahrida BelAESni rasman ochib bergan edi.
“Tarixiy daqiqalar: mamlakat atom energetikasi derjavasiga aylanmoqda”, – degan edi prezident ochilish marosimida.
Hozirda BelAES birinchi energiya blokining quvvati 400 megavattni tashkil etadi. Kelajakda u 1190 megavattgacha ko‘tarilishi rejalashtirilgan. AES 2021-yilning birinchi choragida tijorat maqsadlarida foydalanishga topshirilishi kutilmoqda.Ma’lumot uchun, elektrostansiya Rossiya hamda Belarus o‘rtasida tuzilgan kelishuvga muvofiq “Rosatom” tuzilmasida 2011-yildan 2019-yilga qadar qurilgan edi. “Rosatom” vakillarining ma’lum qilishicha, Jizzax viloyati Forish tumanidagi Tuzkon ko‘li yaqinida qurilajak O‘zbekistondagi ilk atom elektr stansiyasi ham xuddi shu loyiha bo‘yicha barpo etiladi.
Avvalroq Belarusdagi AESda avariya sodir bo‘lsa, Litvada Vilnyus aholisiga bepul yod tarqatilishi haqida xabar berilgan edi.
Izoh (0)