G‘olibligi haqida Amerikaning yirik ommaviy axborot vositalari xabar bergan AQSh prezidentligiga nomzod Jo Bayden prezidentlik lavozimiga kirishgandan so‘ng Donald Trampning bir qator farmonlarini bekor qilishni rejalashtirmoqda. Bu haqda The Washington Post’ga tayanib, “RBK” xabar berdi.
Nashr ma’lumotlariga ko‘ra, Bayden AQShni Parij iqlim kelishuviga qaytarib, mamlakatning Jahon sog‘liqni saqlash tashkilotidan chiqishini bekor qilmoqchi.
Bundan tashqari, musulmon mamlakatlaridan kelganlar uchun mamlakatga kirish taqiqini olib tashlamoqchi, AQShga yoshligida noqonuniy tarzda keltirilgan shaxslarga mamlakatda qolishga imkon beruvchi dasturni tiklash niyatida.
Shuningdek, Bayden koronavirusga qarshi kurashish uchun maxsus guruh tuzadi. Uning tarkibini 9-noyabr kuni e’lon qiladi.
Tramp AQShning JSSTdan rasmiy ravishda chiqib ketishi to‘g‘risida Kongressni iyul oyida xabardor qilgandi. Unga qadar prezident tashkilotning pandemiya davridagi harakatlarini bir necha bor tanqid qilgan. Tramp JSST Xitoydagi vaziyatga haddan tashqari ko‘p e’tibor qaratayotgani va noto‘g‘ri tavsiyalar berganini ta’kidlab kelgan.
Ushbu voqealar fonida AQSh aprel oyidayoq tashkilotni moliyalashni to‘xtatgan edi. Rasmiy ravishda esa AQSh JSSTni 2021-yilning iyulida tark etadi.
Iqlim bo‘yicha Parij kelishuviga esa AQSh 2016-yilda, hali Tramp hokimiyat tepasiga kelmasidan avval qo‘shilgandi. Biroq oradan bir yil o‘tib, u AQSh kelishuvdan voz kechishini ma’lum qildi. Uning fikricha, ushbu bitim mamlakat aholisiga “shafqatsiz” iqtisodiy va moliyaviy majburiyatni yuklaydi. Tramp Parij bitimi shartlarini bajarish, AQShda 2025-yilga kelib 2,7 millionta ish o‘rinlari yo‘qolishiga olib kelishini aytgan.
Eslatib o‘tamiz, AQSh ommaviy axborot vositalari, xususan, Associated Press, CNN, The New York Times, ABC News, Fox News va boshqalar 7-noyabr kuni Jo Baydenni AQShning saylangan prezidenti deb e’lon qildi. Prezident saylovi 3-noyabr kuni o‘tib bo‘lgan, ammo ularning yakuniy natijalari pochta orqali ovoz berilganligi va saylovga rekord darajada ko‘p (avvalgi yillardagidan 15 millionga ko‘p) saylovchilar kelganligi tufayli kechikdi. Bayden prezident saylovida g‘olib chiqish uchun tanlovchilarning kamida 270 ta ovozi kerak bo‘lgan holatda 273 ta ovozni qo‘lga kiritgan.
AQShning amaldagi prezidenti Donald Tramp esa hozircha mag‘lubiyatini tan olishdan bosh tortdi. Tanlovchilar hay’ati prezidentni rasman 14-dekabr kuni saylaydi.
The New York Times’ning yozishicha, 77 yoshli Bayden 20-yanvar kuni AQShning 46-prezidenti sifatida qasamyod qiladi va ushbu lavozimni egallagan tarixdagi eng keksa shaxsga aylanadi.
Avvalroq Bayden AQShning dunyo oldidagi hurmatini qaytarishga va’da bergani haqida xabar berilgan edi.
Izoh (0)