Finlyandiya aeroportida itlar koronavirusni PZR-testlardan ko‘ra tezroq aniqlamoqda

Xelsinki-Vantaa aeroportida ishlayotgan itlar koronavirusni testlardan ko‘ra tezroq aniqlamoqda, deb xabar beradi Express.

Sinov jarayonida bir kun davomida itdan foydalangan holda 100 ga yaqin yo‘lovchi tekshiruvdan o‘tkazilgan. Aeroportga kelgan yo‘lovchilardan navbatga turish va terisini salfetka bilan artish so‘ralgan. Shundan so‘ng salfetkalar bankaga joylashtirilib, itlarga hidlash uchun berilgan.

Hayvonlar ma’lum bir harakatlar bilan kasallik ehtimolligini ko‘rsatishga o‘rgatilgan. Agarda it xodimlarni “test ijobiy” ekanligi to‘g‘risida ogohlantirsa, yo‘lovchi PZR-tekshiruvdan o‘tishi kerak.

Hozircha tajribada 2200 ga yaqin yo‘lovchi va 16 ta it ishtirok etgan. Turistlar o‘z ixtiyori bilan qatnashmoqda. Ta’kidlanishicha, tadqiqot dekabr oxiriga qadar o‘tkaziladi.

Xelsinki universitetidan bo‘lgan Anna Xilm-Byermanning so‘zlariga ko‘ra, aeroportlarda iztopar itlardan foydalanish PZR-testdan ko‘ra tezkor va arzon tushadi. Ayni vaqtda ushbu sinov uchun taxminan 300 ming yevro sarflanmoqda, biroq ekspertlarning qayd etishicha, bu tahlillarni o‘tkazishdan ko‘ra arzon.

“COVID-19 kabi respirator kasalliklar tanamiz hidini o‘zgartirishini bilamiz, shu sababli itlar ularni aniqlash ehtimolligi juda yuqori”, — deydi London gigiyena va tropik tibbiyot kasalliklarga qarshi kurash kafedrasi mudiri, professor Jeyms Logan.

Avvalroq Dubay aeroportida ham COVID-19’ni aniqlash uchun harbiy xizmat itlaridan foydalanilayotgani to‘g‘risida xabar berilgandi.