Финляндия аэропортида итлар коронавирусни ПЗР-тестлардан кўра тезроқ аниқламоқда

Хельсинки-Вантаа аэропортида ишлаётган итлар коронавирусни тестлардан кўра тезроқ аниқламоқда, деб хабар беради Express.

Синов жараёнида бир кун давомида итдан фойдаланган ҳолда 100 га яқин йўловчи текширувдан ўтказилган. Аэропортга келган йўловчилардан навбатга туриш ва терисини салфетка билан артиш сўралган. Шундан сўнг салфеткалар банкага жойлаштирилиб, итларга ҳидлаш учун берилган.

Ҳайвонлар маълум бир ҳаракатлар билан касаллик эҳтимоллигини кўрсатишга ўргатилган. Агарда ит ходимларни «тест ижобий» эканлиги тўғрисида огоҳлантирса, йўловчи ПЗР-текширувдан ўтиши керак.

Ҳозирча тажрибада 2200 га яқин йўловчи ва 16 та ит иштирок этган. Туристлар ўз ихтиёри билан қатнашмоқда. Таъкидланишича, тадқиқот декабрь охирига қадар ўтказилади.

Хельсинки университетидан бўлган Анна Хилм-Берманнинг сўзларига кўра, аэропортларда изтопар итлардан фойдаланиш ПЗР-тестдан кўра тезкор ва арзон тушади. Айни вақтда ушбу синов учун тахминан 300 минг евро сарфланмоқда, бироқ экспертларнинг қайд этишича, бу таҳлилларни ўтказишдан кўра арзон.

«COVID-19 каби респиратор касалликлар танамиз ҳидини ўзгартиришини биламиз, шу сабабли итлар уларни аниқлаш эҳтимоллиги жуда юқори», — дейди Лондон гигиена ва тропик тиббиёт касалликларга қарши кураш кафедраси мудири, профессор Жеймс Логан.

Аввалроқ Дубай аэропортида ҳам COVID-19’ни аниқлаш учун ҳарбий хизмат итларидан фойдаланилаётгани тўғрисида хабар берилганди.