Xitoy vaksinasi O‘zbekistonda 5 mingga yaqin kishida sinovdan o‘tkaziladi

Xitoy Fanlar akademiyasi Mikrobiologiya instituti tomonidan tayyorlangan vaksina sinovining uchinchi bosqichi O‘zbekistonda ham o‘tkazilishi ma’lum qilingandi. Innovatsion rivojlanish vazirligi bo‘lim boshlig‘i Feruza Xo‘jayevaning “Kun.uz”ga ma’lum qilishicha, ushbu vaksina sinovida O‘zbekistonda 5 mingga yaqin kishi ishtirok etadi.

Vazirlik vakilining aytishicha, 6-noyabr kuni mazkur vaksinani yaratish va ishlab chiqishda qatnashgan bir guruh xitoylik olimlar O‘zbekistonga kelishi kutilmoqda. Xitoy kompaniyasi vaksina klinik sinovlarining uchinchi bosqichini 5000 nafarga yaqin o‘zbekistonlik talabgorlar o‘rtasida o‘tkazishni o‘z zimmasiga oldi.

“Albatta, bu juda murakkab jarayon. Vaksinani qo‘llash uchun uni bir necha bosqichda sinovdan o‘tkazish kerak. Buning ikki bosqichi Xitoyda o‘tkazilgan. Uchinchisi esa bir nechta davlatlar bilan bir qatorda bizning mamlakatda ham o‘tkaziladi.

Agar sinovlar muvaffaqiyatli yakunlansa, O‘zbekiston vaksinani imtiyozli narxlarda sotib olish huquqiga ega bo‘ladi hamda vaksina Markaziy Osiyoning boshqa davlatlariga O‘zbekiston orqali tarqatilishi nazarda tutilgan.

Tashrif davomida birinchi navbatda vaksinani qo‘llash bo‘yicha tashkiliy-huquqiy masalalar o‘rganiladi. Bu masala yuzasidan tegishli qarorlar qabul qilinadi. Xitoylik olimlar bilan vaksina kelajakda qanday qo‘llanishi va aholining qaysi qatlamlari unda ishtirok etishi masalalari kelishib olinadi”, — degan Feruza Xo‘jayeva.

Eslatib o‘tamiz, 21-oktabr kuni Innovatsion rivojlanish vazirligi koronavirusga qarshi vaksinaning klinik sinovlarini O‘zbekistonda tashkil etish masalasi bo‘yicha Xitoy fanlar akademiyasining Mikrobiologiya instituti va Anhui Zhifei Longcom Biopharmaceutical kompaniyasi vakillari bilan muzokaralar o‘tkazgan edi.

Unga ko‘ra, sinov 18 va undan katta yoshdagi ko‘ngillilarda o‘tkaziladi va sinov boshlanishidan oldin Xitoy vakillari emlash shartlarini tushuntirish uchun bir nechta treninglar tashkillashtiradi.

Agar ko‘ngillilar orasida biror kishida asoratlar yoki nojo‘ya ta’sir kuzatilsa, o‘sha ko‘ngilli shaxs bepul davolanadi. Shuningdek, ko‘ngillilar ishtiroki uchun pul mablag‘i berilishi ham mumkin.