Ijtimoiy tarmoqlarda Asalhoney taxallusi ostida tanilgan Asal Xo‘jayeva Toshkent shahar Mirzo Ulug‘bek tumani ma’muriy sudi qarori bilan jinoiy javobgarlikka tortildi. Bu haqda “Qalampir.uz” xabar berdi.
Ma’lum bo‘lishicha, 2020-yilning 31-oktabr kuni fuqaro Murodjon Abdullayev Asalhoneyga qo‘ng‘iroq qilgan. Yigit suhbat davomida Asal Xo‘jayevaga qilayotgan ishlari yaxshi emasligi, yoshlarning ongiga salbiy ta’sir ko‘rsatayotganini aytgan.
Ammo Asal Xo‘jayeva erkakning so‘zlariga haqorat bilan javob qaytargan. Shuningdek, Asal Xo‘jayeva qo‘ng‘iroq jarayonini videotasvirga olib, Instagram’dagi o‘z sahifasiga joylashtirgan. O‘z navbatida, ushbu videotasvirlar internet orqali tarqalgach Murodjon Abdullayevga turli odamlar qo‘ng‘iroq qilib, uni haqoratlagan. Jabrlanuvchi mazkur holat yuzasidan Mirzo Ulug‘bek tumani ma’muriy sudiga shikoyat qilgan.
Sud voqeani batafsil o‘rganib chiqdi. Sud qaroriga ko‘ra, Xo‘jayeva Asal Matyoqubovna O‘zbekiston Respublikasi Ma’muriy javobgarlik to‘g‘risidagi kodeksning 41-moddasi (haqorat qilish) hamda 183-moddasi (mayda bezorilik) bilan aybdor deb topildi. Asal Xo‘jayevaga nisbatan Ma’muriy javobgarlik to‘g‘risidagi kodeksning 41-moddasiga asosan bazaviy hisoblash miqdorining 20 barobari miqdorida, ya’ni 4 460 000 ming so‘m jarima jazosi, shuningdek, 183-moddaga asosan uzil-kesil 5 sutka ma’muriy qamoq jazosi tayinlandi.
Eslatib o‘tamiz, Asalhoney 2020-yilning 5-may oqshomida o‘zi yashaydigan uyda bir erkakning hujumiga uchragandi. Erkak uni urib, tanasini skotchlab ketgandi. Asalhoney ichki ishlar xodimlari tomonidan qutqarilgandi.
Izoh (0)