Ижтимоий тармоқларда Асалҳоней тахаллуси остида танилган Асал Хўжаева Тошкент шаҳар Мирзо Улуғбек тумани маъмурий суди қарори билан жиноий жавобгарликка тортилди. Бу ҳақда «Qalampir.uz» хабар берди.
Маълум бўлишича, 2020 йилнинг 31 октябрь куни фуқаро Муроджон Абдуллаев Асалҳонейга қўнғироқ қилган. Йигит суҳбат давомида Асал Хўжаевага қилаётган ишлари яхши эмаслиги, ёшларнинг онгига салбий таъсир кўрсатаётганини айтган.
Аммо Асал Хўжаева эркакнинг сўзларига ҳақорат билан жавоб қайтарган. Шунингдек, Асал Хўжаева қўнғироқ жараёнини видеотасвирга олиб, Instagram’даги ўз саҳифасига жойлаштирган. Ўз навбатида, ушбу видеотасвирлар интернет орқали тарқалгач Муроджон Абдуллаевга турли одамлар қўнғироқ қилиб, уни ҳақоратлаган. Жабрланувчи мазкур ҳолат юзасидан Мирзо Улуғбек тумани маъмурий судига шикоят қилган.
Суд воқеани батафсил ўрганиб чиқди. Суд қарорига кўра, Хўжаева Асал Матёқубовна Ўзбекистон Республикаси Маъмурий жавобгарлик тўғрисидаги кодекснинг 41-моддаси (ҳақорат қилиш) ҳамда 183-моддаси (майда безорилик) билан айбдор деб топилди. Асал Хўжаевага нисбатан Маъмурий жавобгарлик тўғрисидаги кодекснинг 41-моддасига асосан базавий ҳисоблаш миқдорининг 20 баробари миқдорида, яъни 4 460 000 минг сўм жарима жазоси, шунингдек, 183-моддага асосан узил-кесил 5 сутка маъмурий қамоқ жазоси тайинланди.
Эслатиб ўтамиз, Асалҳоней 2020 йилнинг 5 май оқшомида ўзи яшайдиган уйда бир эркакнинг ҳужумига учраганди. Эркак уни уриб, танасини скотчлаб кетганди. Асалҳоней ички ишлар ходимлари томонидан қутқарилганди.
Изоҳ (0)