Namanganda IIB xodimi yerni o‘zboshimchalik bilan egallab olgan fuqaroga tan jarohati yetkazdi

Namangan viloyati Pop tumanida ichki ishlar xodimi 27-oktabr kuni yerni noqonuniy egallab olgan erkakka jarohat yetkazdi, deya xabar bermoqda viloyat IIB axborot xizmati.

Ma’lum qilinishicha, Pop tumani ichki ishlar bo‘limi profilaktika inspektori 2020-yilning 27-oktabr kuni soat 14:00 larda “Qo‘shminor” MFYda yashovchi 1972-yilda tug‘ilgan ayolga tuman hokimligi tomonidan tadbirkorlik qilish uchun ajratilgan yerda o‘rganish olib borgan.

Yer maydonida “Qo‘shminor” MFY raisi hamda tuman yer kadastr bo‘lim mutaxassislari bilan birgalikda ayol arizasi yuzasidan o‘rganish amalga oshirilgan. Natijada “G‘urumsaroy” MFYda yashovchi 1982-yilda tug‘ilgan fuqaro o‘zboshimchalik bilan hech kimdan so‘ramay, yerni egallab olgani aniqlangan.

Shu bilan birga, fuqaro texnikalarni yer ichiga olib kirib ishlatayotganligi ma’lum bo‘lgan. Fuqaroga bu harakatlari qonunga to‘g‘ri kelmasligini, nizoli holatni oldini olish maqsadida faollar tomonidan dalolatnoma tuzib, vaqtincha qurilish texnikalarini to‘xtatib turish tushuntirilganda fuqaro ko‘pchilik oldida arizachi ayolni uyatli so‘zlar bilan so‘kib, haqorat qilib, kamsitgan.

Shundan so‘ng fuqaroni tinchlantirish uchun huquqbuzarlik profilaktikasi bo‘limi profilaktika inspektori tomonidan tartibga chaqirilgan vaqtida fuqaro IIB xodimiga ham faol qarshilik ko‘rsatib, uning talablariga bo‘ysunmagan. Fuqaroni yaqin IIO tayanch punktiga olib borish maqsadida chap qo‘l bilak sohasiga qo‘l kishani solinib, olib ketilayotganda fuqaro uni shifoxonaga olib borishlarini so‘ragan.

So‘ng fuqaro Pop tuman tibbiyot birlashmasiga olib kelinib, tibbiy ko‘rikdan o‘tkazilgan va sodir etilgan huquqbuzarlik holati yuzasidan hujjatlar rasmiylashtirilgan. Fuqaro Pop tuman tibbiyot birlashmasiga murojaat qilib, Pop tuman IIB 7-son XPG TP katta inspektori tomonidan unga nisbatan tan jarohati yetkazganligini bayon qilgan.

Sud-tibbiy ekspertizasi Pop tumani bo‘limining 2020-yil 27-oktyabrdagi dastlabki ma’lumotnomasida esa fuqaroning jarohati chap bilak yumshoq to‘qimalarining lat yeyishi va shilingan jarohatlar aniqlanganligi ko‘rsatilgan. Ushbu holat bo‘yicha tuman prokuraturasiga xabar berilib, hozirda prokuratura tomonidan surishtiruv harakatlari olib borilayotgani ma’lum qilingan.

Avvalroq Andijon viloyati hokimligi binosi oldida aholi tomonidan norozilik uyushtirilganiga izoh berilgandi.