Namangan viloyati hokimi Shavkatjon Abdurazzoqovga ikki maslahatchi tayinlandi. Bu haqda “Daryo” muxbiri Azizbek Abduvaliyev xabar bermoqda.

Foto: Namangan viloyati hokimligi axborot xizmati

Botirjon Nuriddinov Namangan viloyati hokimining turizm va sport masalalari bo‘yicha maslahatchisi etib tayinlandi.

Botirjon Nuriddinov 1976-yilda Namangan shahrida tug‘ilgan. Ma’lumoti oliy, Namangan muhandislik-pedagogika instituti, Prezident huzuridagi Davlat boshqaruvi akademiyasi hamda Osiyo va Tinch okeani universitetini (Yaponiya) tamomlagan.

2000—2017-yillar davomida Iqtisodiy nochor korxonalar ishlari bo‘yicha viloyat boshqarmasi, viloyat ko‘chmas mulk birjasi, “O‘zagrosug‘urta” Namangan shahar bo‘limi, Namangan shahar hokimligida mas’ul lavozimlarda ishlagan.

U 2017-yildan buyon Yaponiyaning Hopeas savdo kompaniyasi menejeri sifatida faoliyat yuritib kelayotgan edi.

Akbarali Asqarov Namangan viloyati hokimining madaniyat masalalari bo‘yicha maslahatchisi etib tayinlandi.

Foto: Namangan viloyati hokimligi axborot xizmati

Akbarali Asqarov 1962-yili Uychi tumanida tug‘ilgan. Ma’lumoti oliy, Toshkent davlat konservatoriyasini tamomlagan.

1988—2018-yillar davomida Yangiyer tumani madaniyat uyi badiiy rahbari, “Umid” ansambli musiqa rahbari, “Navbahor” ansambli badiiy rahbari, Namangan viloyati madaniyat ishlari boshqarmasi boshlig‘i, “O‘zbekraqs” viloyat bo‘limi badiiy rahbari, Akademik va xalq badiiy jamoalari direksiyasi Namangan viloyati bo‘limi direktori, Madaniyat va sport ishlari vazirligi boshqarma boshlig‘i o‘rinbosari, Alisher Navoiy nomidagi Namangan viloyat musiqali drama teatri direktori, “Mumtoz” ashula ansambli badiiy rahbari lavozimlarida ishlagan.

U 2018-yildan buyon O‘zbekiston davlat filarmoniyasi o‘zbek milliy mumtoz ashula ansambli badiiy rahbari sifatida faoliyat yuritib kelayotgan edi.