Shahrisabzda 30 million so‘mlik ko‘mir mahsulotlarini talon-toroj qilgan ko‘mir ombori mudiriga jinoyat ishi qo‘zg‘atildi. Bu haqda “Daryo”ga huquq-tartibot organlaridagi manbasi xabar berdi.
DXX Qashqadaryo viloyati boshqarmasi, huquq-tartibot organlari bilan hamkorlikda “O‘zbekko‘mir” AJ “Qashqadaryo ko‘mir yetkazuvchi” filialiga qarashli Shahrisabz ko‘mir omborida tezkor tadbir o‘tkazilgan.
Tadbir davomida Shahrisabz ko‘mir ombori mudiri T.H. budjet mablag‘lari hisobidan ijtimoiy soha obyektlariga yetkazib berilishi uchun Angren shahridan keltirilgan ko‘mir mahsulotining salkam 80 tonnasini hech qanday hujjatsiz Shahrisabz shahrida joylashgan “Land zaytun” xususiy korxonasi omborxonasiga yetkazib bergani aniqlangan. Shu yo‘l bilan 23 million so‘mdan ortiq ko‘mir mahsuloti talon-toroj qilingan.
Bundan tashqari, tekshiruv davomida “O‘zko‘mir” AJ “Qashqadaryo ko‘mir yetkazuvchi” filialiga qarashli ko‘mir omboridan ijtimoiy soha obyektlari uchun 2020-yilning sentabr oyi davomida yetkazib berilgan ko‘mir mahsulotlarining tarqatilishi va haqiqatda mavjudligi o‘rganilganda Shahrisabz ko‘mir ombori mudiri T.H.ning javobgarligida 1286,6 tonna ko‘mir qoldig‘i mavjud bo‘lib, ushbu hisobotdagi qoldiq bilan o‘lchovdagi qoldiq taqqoslanganda 24,1 tonna, jami 30 million 984 ming so‘mlik ko‘mir mahsuloti talon-toroj qilingani aniqlangan.
Mazkur holat yuzasidan T.H.ga nisbatan Jinoyat kodeksining tegishli moddalari bilan jinoyat ishi qo‘zg‘atilgan.
Izoh (0)